काठमाडौँ, १७ वैशाख । चुरे क्षेत्रको संरक्षण तथा सम्बद्र्धन क्रमिक रुपमा हुँदै गएको भन्दै स्थानीयवासीले सन्तोष व्यक्त गरेका छन् ।
वातावरण संरक्षण र सम्बद्र्धनका क्षेत्रमा डेढ दशकदेखि काम गर्दे आएको परिवर्तन नेपालको सहयोगमा वातावरण संरक्षण र सम्बद्र्धन भएको स्थानीयवासीले बताएका छन् ।
मकवानपुर छत्तिवनका स्थानीय शिक्षक भरतप्रसाद सापकोटा परिवर्तन नेपालले गरेको कामले नदी कटान नियन्त्रण भई चुरे कटानमा कमी आएको बताउनुहुन्छ । उहाँका अनुसार तराईका दुई जिल्लामा दुई हजार हेक्टर भन्दा बढी जग्गा संरक्षित भएको छ ।
परिवर्तन नेपालले हाल सिन्धुली, मकवानपुर, सर्लाही र रसुवा जिल्लामा काम गर्दै आइरहेको छ ।
सिन्धुलीका स्थानीयवासी लेखनाथ न्यौपानेले वन क्षेत्रमा हुने चरिचरन बन्द गरेर नदी संरक्षण हुनुका साथै नदी कटान रोकिएको बताउनुहुन्छ । उहाँ भन्नुहुन्छ, “यो कार्यक्रम सञ्चालन भएपछि प्रशस्त मात्रामा घाँस, दाउरा पाउन सकेका छौँ । यसलाई अरु क्षेत्रमा पनि लागू गर्न जरुरी छ ।”
आज यहाँ आयोजित एक कार्यक्रममा बर्सेनि आउने वर्षाको पानीले चुरे तथा तराईका विभिन्न क्षेत्रमा दुःख दिँदैआएका सन्दर्भमा यसको संरक्षण तथा सम्बद्र्धनका लागि परिवर्तन नेपाल जुटेको जानकारी दिइयो ।
व्यवस्थापिका–संसद विकास समितिका सभापति रवीन्द्र अधिकारी वन संरक्षण र सम्बद्र्धन गर्न सकेमात्र विकास हुने बताउनुभयो । उहाँले भन्नुभयो, “जबसम्म वातावरण संरक्षण गर्न सकिँदैन तवसम्म दिगो विकासको कल्पना गर्न सकिँदैन ।”
पैसा र वातावरण दुबै नाश हुन नदिन योजना बनाएर काम गर्न आवश्यक रहेको उहाँको भनाइ थियो ।
परिवर्तन नेपालका निर्देशक दिनेशकुमार श्रेष्ठले वातावरण संरक्षणबाट नदी कटानमा कमी आएको बताउनुभयो । उहाँका अनुसार सर्लाही, मकवानपुर र सिन्धुलीको तीन हजार हेक्टर नदी किनार संरक्षित भएको छ । रासस
No comments:
Post a Comment