जनगायकको कथा : ‘डढेलोभित्रका सतिसाल’

काठमाडौँ, ३० वैशाख । जनगायक रामेशसहित अन्य गायक, सर्जक र सोसम्बन्धी जानकारको अनुभव समेटिएको वृत्तचित्र ‘डढेलोभित्रका सतिसाल’को छायाङ्कन सकिएको छ ।

‘समाज रूपान्तरणका स्वरहरू’ उपशीर्षक दिइएको ९० मि लामो उक्त वृत्तचित्रमा रामेशलाई केन्द्रविन्दुमा राखिएको छ । उहाँले करिब ५५ वर्ष लामो गायन यात्रा गर्दा भोगेका आरोह–अवरोहलाई वृत्तचित्रले समेटेको छ । रामेशलगायत साथीहरुले गाएको ‘गाउँ गाउँबाट उठ…’, ‘एक जुगमा एक दिन, एकचोटि आउँछ…’, ‘आऊ मिलाऊ हाम्रा हातहरू…’, ‘मेरो प्यारो ओखलढुङ्गा…’, ‘ गाई त बाँध्यौँ ढुङ्ग्रोमा मोही छैन…’, ‘कोही त भने जहाजमा हरर…’ जस्ता गीत जनस्तरमा निकै लोकप्रिय छन् ।

त्यस्तै वृत्तचित्रमा जनसङ्गीतमा लागेका रायन, मञ्जुल, जेबी टुहुरे, जीवन शर्मा, माहिला लामा, आभाषदेखि अमृत गुरुङसम्मका कलाकार, गीतकार, सङ्गीतकार, लेखक, विश्लेषक र नेताको अनुभव समेटिएको छ ।

रामेश जन्मेहुर्केको र जनसङ्गीत अभियानमा लागेका स्थान पाल्पा, ओखलढुङ्गा, तेह्रथुम, धरान र काठमाडौँमा गरी २८ दिन लगाएर छायाङ्कन गरिएको हो । यसको प्रथम प्रदर्शन आगामी दसैँ अगाडि हङकङमा गरिनेछ । त्यसपछि नेपालका प्रमुख सहरसँगै विभिन्न अन्तर्राष्ट्रिय चलचित्र महोत्सवमा प्रदर्शन गरिने पत्रकार सम्मेलनमा जनाइएको छ ।

वृत्तचित्रको निर्देशन चलचित्रकर्मी प्रणय लिम्बू र पत्रकार अनुशील (डम्बरकृष्ण श्रेष्ठ)ले संयुक्त रूपमा गर्नुभएको हो भने छायाङ्कन बाबुराम नेपालीको रहेको छ । सार्थक जनसङ्गीत प्रतिष्ठान नेपालको सहकार्यमा हङकङ हिमायतीले वृत्तचित्र निर्माण गरेको हो ।

प्रतिष्ठानका संयोजक श्याम तमोटले देश विदेशमा हुने च्यारिटी सो र प्रदर्शनीबाट सङ्कलित रकम प्रतिष्ठानको कोषमा जम्मा गर्दै जनसङ्गीतको संरक्षण र प्रवद्र्धनमा खर्च गरिने जानकारी दिनुभयो ।

निर्देशकमध्येका अनुशीलले हरेक राजनीतिक आन्दोलन र सामाजिक रूपान्तरणमा महत्वपूर्ण भूमिका खेल्ने जनसङ्गीतको पाटोको इतिहासलाई नयाँ पुस्तामा उजागर गर्ने उद्देश्यले वृत्तचित्र तयार पारिएको बताउनुभयो । रासस