कोरियाली सहयोगलाई निरन्तरता दिइने

त्रिशूली(नुवाकोट), ५ जेठ । नेपालका लागि दक्षिण कोरियाका राजदूत चोइ योङ जीनले कोरिया सरकारको सहयोगलाई सफलतापूर्वक कार्यान्वयन गर्न स्थानीय निकाय र सरकारबीच सहकार्यको आवश्यकता रहेको बताउनुभएको छ ।

बेलकोट स्वास्थ्य चौकीको निर्माणाधीन भवनको आज शिलान्यास गर्दै उहाँले तोकिएको समयमै काम सम्पन्न गरी सेवा प्रवाह गर्न आग्रह गर्नुभयो । उहाँले रु ८४ करोड नुवाकोटका स्वास्थ्य संस्था निर्माणमा सहयोग गरेको बताउनुभयो । उहाँले ‘नुवाकोट भूकम्पपछिको स्वास्थ्य क्षेत्रको सेवा’ भन्ने कार्यक्रम नै सञ्चालन गरी उपकरण, सामग्री र भवन निर्माणमा सहयोग गरेको चर्चा गर्नु भयो ।

गत वर्षको भूकम्पपछि तत्काल असल साथीको रुपमा अत्यावश्यक सामग्री नेपाललाई सहयोग गरेको स्मरण गर्दै राजदूत जीनले आगामी दिनमा सहयोगलाई निरन्तरता दिने बताउनुभयो ।

प्रजिअ विष्णुप्रसाद पोखरेलले नेपाललाई कोइकामार्फत कोरियन सरकारले गरेको सहयोगमा आभार व्यक्त गर्दै सहयोगलाई सदुपयोग गरी भवन निर्माण गर्न सहयोग र समन्वय गर्ने बताउनुभयो ।
कार्यक्रममा युएनडिपीका उपनिर्देशक सोफीले भूकम्पपछिको पुनर्निर्माणका लागि डकर्मी, सिकर्मीलाई स्थानीयस्तरमै तालिम दिएर सक्षम बनाइने बताउनुभयो ।

नुवाकोटमा जिल्ला अस्पतालमा स्थायी संचरना र बाँकी १० स्वास्थ्य संस्थामा प्रिफेव भवन निर्माण गरिने बताइएको छ । रासस