काठमाडौँ, २५ वैशाख । लोकतन्त्र स्थापना र पुनःस्थापनाका लागि आन्दोलनमा सहभागी भई योगदान गर्नेलाई बिपी चिन्तन प्रतिष्ठानले खोजीखोजी सम्मान गर्ने भएको छ ।
दोस्रो राष्ट्रिय सम्मेलन समापनका अवसरमा आज १५ बुँदे काठमाडौँ घोषणापत्र जारी गर्दै प्रतिष्ठानले यस्तो जानकारी दिएको हो ।
प्रतिष्ठानका गतिविधि सञ्चालनका लागि बिपी अक्षयकोष स्थापनाको शुभारम्भसमेत गरिएको कोषाध्यक्ष त्रिलोचन पौडेलले राससलाई जानकारी दिनुभयो ।
“कोषको शुभारम्भमा केन्द्रीय सदस्य रामकृष्ण अमात्य र मकवानपुर जिल्ला समिति सदस्य अमृता थापामगरले रु एक÷एक लाख हस्तान्तरण गरी आजै सुरु गर्नुभएको छ, यसलाई विस्तार गर्दै लैजाने नीति सम्मेलनले पारित गरेको छ” – उहाँले भन्नुभयो ।
काठमाडौँ उपत्यकामा प्रतिष्ठानको सुविधासम्पन्न बिपी चिन्तन भवन र उद्यान, श्रद्धासुमन अर्पण गर्न पूर्ण कदको सालिक, बिपीको योगदान समेटेर चलचित्र निर्माण गर्नेलगायत बुँदा समेटिएको कोषाध्यक्ष पौडेलले बताउनुभयो ।
प्रतिष्ठानले भूकम्पपीडितका लागि सरकारले दिएको अनुदान पीडितसम्म पुगे÷नपुगेको, गुणस्तरीय काम भए÷नभएको विषयमा अनुगमन गर्न अध्यक्ष हरिबोल भट्टराईको संयोजकत्वमा अनुगमन समिति पनि गठन गरेको छ ।
असोज ३ गते नेपाली काँग्रेसका सभापति सुशील कोइराला नेतृत्वको सरकारले संविधानसभाबाट जारी गरेको संविधान कार्यान्वयनमा प्रतिष्ठानले पनि सघाउने निर्णय गरेको छ ।
“संविधानसभाबाट संविधान बनाउने नेपालका पहिलो स्वप्नद्रष्टा बिपी कोइराला हुनुहुन्थ्यो, उहाँको सपनाअनुसार सात दशकपछि जारी भएको संविधान कार्यान्वयनका लागि ७५ वटै जिल्लाका प्रतिष्ठान लागिपर्ने छन्” – अध्यक्ष भट्टराईले भन्नुभयो ।
सम्मेलनमा ७५ जिल्लाका प्रतिनिधि र पर्यवेक्षक गरी ५०० को सहभागिता थियो । सम्मेलनको वैशाख २३ गते बिहीबार काँग्रेस सभापति शेरबहादुर देउवाले उद्घाटन गर्नुभएको थियो । रासस
No comments:
Post a Comment