सेनाद्वारा निर्मित आवासगृह हस्तान्तरण

त्रिशूली(नुवाकोट), १३ असार । प्राकृतिक प्रकोप तथा विपद्का समयमा पीडितका लागि सामूहिक रुपमा बन नेपाली सेनाले बर्सुन्चेतमा बनाएको सामूहिक आवासगृह आज गाविसलाई हस्तान्तरण गरिएको छ ।
बर्सुन्चेत –१ मेघाङमा निर्मित बाह्रकोठे भवन आज सेनाले समुदायलाई हस्तान्तरण गरेको हो । स्थानीय समाजसेवी गौरीमाया घले र हस्तमाया घलेलेसंयुक्त उद्घाटन गरेको भवन हस्तान्तरण कार्यक्रममा श्रीनाथ गणका प्रमुख सेनानी रोहित गुरुङले गाविस सचिव मुक्तिनाथ निरौलालाई सामूहिक आवासको साँचो हस्तान्तरण गर्दै सामूहिक आवासको उचित प्रयोग, संरक्षण र सञ्चालन गर्न आग्रह गर्नुभयो ।
कार्यक्रममा जिविस नुवाकोटका वरिष्ठ कार्यक्रम अधिकृत पुष्कर शर्मा रिमालले विपत्तिका बेला प्रयोगमा ल्याइने आवासगृहको उचित प्रयोग गर्नका लागि राजनीतिक दल, स्थानीय नागरिक र सरोकार भएकाहरु उत्तिकै जिम्मेवार हुनुपर्ने बताउनुभयो ।
बाह्र परिवारलाई विपद्का बेला बस्न मिल्ने भवन नेपाली सेनाका मोहनकाजी श्रेष्ठको नेतृत्वमा ६५ जनाको टोली खटिएर निर्माण गरेको थियो । सेनाले यसअघि थानसिङ, बुधसिङ र ओखरपौवामा सामूहिक आवास निर्माण सम्पन्न गरी गाविसलाई हस्तान्तरण भइसकेको छ । रासस

No related posts.