‘राजनीतिक चरित्र सुध्रिए मात्रै आर्थिक समृद्धि’

तिलोत्तमा (रुपन्देही), ९ असार । राजनीतिक अस्थिरता समृद्ध नेपालको बाधक भएको एक कार्यक्रमका वक्ताले बताएका छन् ।

बुटवल मिडिया प्रकाशन प्रालिबाट प्रकाशित ‘जनसङ्घर्ष’ साप्ताहिकको २७औँ वर्ष प्रवेशका अवसरमा आज बुटवलमा आयोजित ‘सङ्घीय नेपालको आर्थिक समृद्धि’ विषयको अन्तक्र्रियामा पूर्वसांसद देवेन्द्र घिमिरेले मूलधारमा रहेका राजनीतिक दलको चरित्र नसुधारिएसम्म देश आर्थिक विकासमा लाग्न नसक्ने बताउनुभयो । अर्का पूर्वसांसद रामचन्द्र भट्टराईले राजनीतिक उपलब्धि भनिए पनि राष्ट्रियता झन खतरामा पर्दै गएको जनाउँदै आर्थिक समृद्धिका लागि राजनीतिक अधिकार संस्थागत हुनुपर्छ भन्नुभयो ।
रुपन्देहीका प्रजिअ विष्णुप्रसाद ढकालले जङ्गल, जमिन र जलस्रोतको सही व्यवस्थापन तथा पर्यटन विकास अबको आवश्यकता रहेको तर्क दिनुभयो ।

अर्थविद् डा आरसी आचार्यले नेपालले १० वर्षमै आर्थिक कायापलट हुने सम्भावना बोकेको छ भन्दै विप्रेषणबाट आएको ठूलो रकम विलासितामा प्रयोग हुँदा आर्थिक विकासको गति अवरुद्ध भएको बताउनुभयो । अर्थविद् प्रा डा बाबुराम ज्ञवालीले आर्थिक विकासका प्रचुर सम्भावनाको सदुपयोग गर्न नसक्नु नेपालीका लागि विडम्बना हो भन्नुभयो ।

अर्थविद् वैकुण्ठ पाण्डेले हरेक दललाई आर्थिक कार्यसूची बोकेर हिँड्न आग्रह गर्दै आर्थिक विकासका काम गर्ने हो भने अर्काे वर्षसम्ममा मात्रै रु तीस खर्बको कुल गार्हस्थ उत्पादन र रु १५ खर्बको बजेट निर्माण हुन सक्ने जिकिर उहाँले गर्नुभयो ।

कार्यक्रममा अवधारणापत्र प्रस्तुत गर्दै चौतारी लघुवित्तका कार्यकारी अधिकृत मनिकर कार्कीले देशको समृद्धिका लागि सेवामूलक, उद्योग, कृषि क्षेत्र सबैलाई समेटेर लैजानुपर्ने र कुनै एकको असफलतामा अर्काे क्षेत्रले अर्थतन्त्रलाई धान्ने गरी विकास गर्नुपर्ने बताउनुभयो । विदेशी लगानी भित्र्याउँदा प्राथमिकताका आधार तोक्ने र ठूला आयोजनामा मात्रै विदेशी लगानी ल्याउनुपर्ने उहाँको अवधारणा छ ।

न्यूनतम पारिश्रमिक निर्धारण समितिका सदस्य दीपक ज्ञवाली, नेपाल पत्रकार महासङ्घ रुपन्देहीका अध्यक्ष शेरबहादुर केसी, पत्रकार यमलाल भुसाल, नेपाल वाङ्मय प्रतिष्ठानका अध्यक्ष हिमलाल ज्ञवाली, शान्ति समाजका केन्द्रीय सचिव गोविन्द खनाल, अधिकारकर्मी गणेश उचै लगायतले सञ्चारमाध्यमले आर्थिक कार्यसूचीलाई प्राथमिकतामा राखेर बहस चलाउनुपर्ने बताउनुभयो । रासस

No related posts.