रेहा र नासिरलाई ट्रायाथलनको स्वर्ण

काठमाडौँ, ४ असार । द ब्रिटिसा स्कुलकी रेहा प्रधान र जोन डेवी स्कूलका नासिर याहया हुसेनले ‘दोस्रो किड्स ट्रायाथलन च्याम्पियनसिप’मा आज स्वर्ण पदक जितेका छन् ।

प्रतियोगिताकोे छात्रातर्फ ५० मिटर पौडी, १६ सय मिटर साइक्लिङ र ८०० मिटर दौडमा रेहाले ११.२७ मिनेटमा पूरा गर्दै स्वर्ण प्राप्त गर्न सफल भएकी हुन् । त्यस्तै, १२.०३ मिनेटका साथ जोन डेवीकी डुवाना लामाले रजत र १३.३० मिनेटका साथ युलेन्स स्कूलकी तुसिता शाक्यले कास्य प्राप्त गरे ।

नेपाल ट्राइयाथलन सङ्घको आयोजनामा ‘स्विम, वाइक, रन’ भन्ने मूल नाराका साथ सातदोबाटोस्थित पौडी परिसरमा भएको प्रतियोगितामा छात्रतर्फ उक्त दूरी पूरा गर्न नासिरलाई १०.५१ मिनेटको समय लागेको थियो । युलेन्सका जेनिस महर्जन ११.०२ मिनेटका साथ दोस्रो र एभिएमका ओशिस राई ११.०७ मिनेटका साथ तेस्रो स्थानमा रहे ।

ओलम्पिक दिवसको अवसर पारेर आयोजना गरिएकोे प्रतियोगितामा ७० खेलाडीको सहभागिता रहेको थियो । विजयी खेलाडीलाई आपूर्तिमन्त्री गणेशमान पुन र राष्ट्रिय खेलकुद परिषद्का उपाध्यक्ष एवम् नेपाल ओलम्पिक कमिटीका महासचिव लामा टेन्डी शेर्पाले पदक तथा प्रमाणपत्र प्रदान गर्नुभयो ।

साम्बो मङ्गलबार हुने

‘ओलम्पिक डे २०१६’को अवसरमा मङ्गलबार साम्बो प्रतियोगिता हुने भएको छ ।

नेपाल साम्बो महासङ्घको आयोजनामा हुन लागेको प्रतियोगितामा स्पोर्टस् साम्बोतर्फ तीन पुरुष र दुई महिला गरी पाँच तौल समूहमा प्रतिस्पर्धा गराइने नेपाल साम्बो महासङ्घका महासचिव उत्तम श्रेष्ठले जानकारी दिनुभयो ।

प्रतियोगितामा करिब ५० खेलाडीको सहभागिता रहने प्रतियोगिताका खेल गोंगबु साम्बो क्लबमा हुनेछन् । रासस

No related posts.