काठमाडौँ, ८ साउन । अधिकार सम्पन्न वाग्मती सभ्यता एकीकृत विकास समितिले वाग्मती नदी किनारस्थित कार्यालय परिसरमा वृक्षरोपण गरेको छ ।
समितिका कर्मचारी र सञ्चालक समिति सदस्यहरुको सहभागितामा २८५ वैंस जातको बिरुवा रोपिएको बोटविरुवाविद् रामदयालप्रसाद यादवले राससलाई जानकारी दिनुभयो । “हरियाली प्रवद्र्धन गर्न नदी किनारमा एकै जातको बिरुवा लगाइएको हो” – उहाँले भन्नुभयो ।
नदी किनारको ७०० मिटर लम्बाइमा वृक्षरोपण गरिएको समितिले जनाएको छ । वृक्षरोपणसँगै कार्यालय परिसरमा सरसफाइ पनि गरियो ।
सफा सहर कार्यक्रमअन्तर्गत हरियाली प्रवद्र्धन गर्नका लागि सहरी विकास मन्त्रालयले सरकारी कार्यालयबीच गरेको प्रतियोगितात्मक सरसफाइ कार्यक्रममा वाग्मती समिति प्रथम भएको छ । बढ्दो सहरीकरणसँगै हरियाली प्रवद्र्धनको महत्व र आवश्यकताका लागि सरकारी निकायको प्रयास कस्तो छ भन्ने मूल्याङ्कनमा समिति छनोट भएको हो ।
सहरी विकास तथा भवन निर्माण विभाग दोस्रो भएको छ भने सामान्य प्रशासन मन्त्रालय तेस्रो भएको छ । प्रतियोगितात्मक कार्यक्रममा प्रथमले नगद स्वरुप रु दुई लाख, दोस्रोले रु एक लाख र तेस्रोले रु ५० हजार पाएका छन् । पुरस्कार हरियाली प्रवद्र्धनमा खर्च गर्नुपर्ने मन्त्रालयले जनाएको छ । रासस
No comments:
Post a Comment