धनगढी, २ साउन । साझा प्रकाशन सञ्चालक समितिको टोलीले आज यहाँस्थित साझा प्रकाशन क्षेत्रीय कार्यालयको छड्के निरीक्षण गरेको छ ।
प्रकाशनका अध्यक्ष डोलिन्द्रप्रसाद शर्माको नेतृत्वको टोलीले गरेको निरीक्षणमा कार्यालयका प्रमुख छविलाल रिलामीलगायत कर्मचारी छड्केमा परेको टोलीमा रहेका प्रकाश सिलवालले बताउनुभयो । साझा प्रकाशन क्षेत्रीय कार्यालय धनगढीमा सातजना कर्मचारी कार्यरत रहेको बताइएको छ ।
प्रकाशनको सञ्चालक समितिका सदस्य डा विजय सुब्बा, जीवनचन्द्र कोइराला र हरिहर खनालसमेत सहभागी टोलीले क्षेत्रीय कार्यालय धनगढीको स्वामित्वमा रहेको चलअचल सम्पतिबारे पनि जानकारी लिएको छ ।
साझा प्रकाशनले वर्षौँदेखि विद्यालय तहका पाठ्यपुस्तक बिक्री वितरण गर्दै आएको थियो । यद्यपि पछिल्लो केही वर्षदेखि जनक शिक्षा सामग्री केन्द्र आफैले पाठ्यपुस्तक बिक्री वितरण गर्न थालेकाले प्रकाशन घाटामा गई हाल कामविहीन झैँ अवस्थामा पुगेको बताइन्छ ।
हाल रु ४० करोड ऋणमा डुबेको साझा प्रकाशनलाई सरकारबाट सहयोग नभएपछि देशभर रहेका आफ्ना चल अचल सम्पति बिक्री गरेर ऋण चुक्ता गर्ने योजनाअनुसार प्रकाशन सञ्चालक समितिको टोली निरीक्षणमा आएको बताइएको छ । रासस
No comments:
Post a Comment