श्रीमतीको हत्याको आरोपमा श्रीमान् पक्राउ

भक्तपुर, २९ असार । सूर्यविनायक नगरपालिका–४ सल्लाघारीमा आज एक महिलाको हत्या भएको छ ।

भक्तपुरको सल्लाघारीमा परिवारसँग बस्दै आएकी २३ वर्षीया दीपा कार्कीको हत्या भएको भक्तपुरका प्रहरी उपरीक्षक किरण बज्राचार्यले जानकारी दिनुभयो ।

हत्या आशङ्कामा प्रहरीले आजै अपराह्न दीपाको श्रीमान् २५ वर्षीय विजय कार्कीलाई काठमाडाँै विमानस्थलबाटै पक्राउ गरेको उहाँले बताउनुभयो । प्रहरीले कार्कीको मोबाइल ‘ट्र्याक’ गरेर पछ्याउँदै विमानस्थलबाट भाग्न लागेको अवस्थामा पक्राउ गरेको र उसको कपडामा रगत लागेकाले हत्या श्रीमान्बाटै भएको हुनसक्ने बताएको छ ।

घटनास्थल पुगेका महानगरीय प्रहरीवृत्त जगातेका प्रहरी नायब उपरीक्षक मित्रबन्धु शर्माले आज दिउँसो हम्मरले टाउकामा हानेर हत्या गरेर श्रीमान् फरार भएको प्रारम्भिक अनुमान गरिएको बताउनुभयो ।

हम्मरले हानेर मृतकको टाउकामा गम्भीर चोट लागेर मृत्यु भएको पाइएको जानकारी दिँदै उहाँले मृतकका सासूससुरा दुई वर्षीय र चार वर्षीय छोरा थानकोटमा विवाहमा गएको मौका पारेर घरको पहिलो तलामा हत्या गरेको पाइएको प्रहरी नायब उपरीक्षक शर्माले जानकारी दिनुभयो ।

हत्या आशङ्कामा पक्राउ परेका मृतककी पति विजयलाई प्रहरीवृत्त जगातेमा राखेर अनुसन्धान सुरु गरिएको छ । साँझ मृतकको शव परीक्षणका लागि शिक्षण अस्पताल पठाइएको छ । रासस

No related posts.