काठमाडौँ, २३ साउन । एफसी कपको तयारीमा रहेको राष्ट्रिय लिग विजेता थ्रीस्टार क्लब र त्रिभुवन आर्मी क्लबले मैत्रीपूर्ण खेलमा १–१ को बराबरी खेलेका छन् ।
सातदोबाटोस्थित एन्फा कम्प्लेक्सको मैदानमा आज भएको खेलमा थ्रीस्टारका विदेशी खेलाडी अजायी मार्टिन्स कायोडेले खेलको चौथो मिनेटमा अग्रता दिलाएका थिए । उनले सरोज दाहालको पासलाई सदुपयोग गरेका थिए ।
तर खेलको निर्धारित समय सकिएर थपिएको चार मिनेटको अन्तिम समयमा आर्मीका नवयुग श्रेष्ठले गोल गरेपछि थ्रीस्टार बराबरीमा राकियो । योसँगै दुई अभ्यास खेलमा थ्रीस्टार अपराजित रहन भने सफल भयो । शुक्रबार भएको पहिलो खेलमा उसले नेपाल एपिएफ क्लबलाई ५–० ले हराएको थियो ।
विसं २०७१ को राष्ट्रिय लिगको विजेताका नाताले थ्रीस्टार नेपालको प्रतिनिधित्व गर्दै यही अगस्ट २१ तारिखदेखि मङ्गोलियामा सुरु हुने एएफसी कपको प्लेअफ छनोटमा सहभागी हुन लागेको हो ।
प्रतियोगितामा थ्रीस्टार समूह ‘बि’मा परेको छ । उक्त समूहमा आयोजक मङ्गोलियाको एर्चिम फुटबल क्लब र कम्बोडियाको नागावोर्ल्ड फुटबल क्लब रहेका छन् । थ्रीस्टारले अगस्ट २१ तारिखमा आयोजक एर्चिमको सामना गर्नेछ भने अगस्ट २३ मा नागावोर्ल्डँग खेल्नेछ । तीन समूहमा विभाजन गरिएको प्लेअफ छनोट चरणमा नौ टोलीको सहभागिता रहेको छ । तीनवटै समूहका विजेता अर्को चरणमा पुग्ने प्रावधान छ । रासस
No related posts.
No comments:
Post a Comment