फोहोर व्यवस्थापनमा जनप्रतिनिधिको सहभागिता आवश्यक

काठमाडौँ, २७ असार । काठमाडौँ उपत्यकाको फोहोरमैला व्यवस्थापनमा निजी क्षेत्रको सहभागिता गराउँदा स्थानीय तहका जनप्रतिनिधिलाई पनि संलग्न गराइनुपर्ने औँल्याइएको छ ।

आज यहाँ लगानी बोर्डले आयोजना गरेको उपत्यकाको एकीकृत फोहोर व्यवस्थापनमा काठमाडौँ जिल्लाका स्थानीय तहका प्रमुख, उपप्रमुख र कार्यकारी अधिकृतसहित सरोकारवाला सबैलाई सहभागी गराउन पर्ने जनप्रतिनिधिले औँल्याए ।

कामपाका उपप्रमुख हरिप्रभा खड्गीले जनप्रतिनिधिको सहभागितामा फोहोरलाई उद्योग सञ्चालनको कच्चा पदार्थका रुपमा उपयोग गर्न निजी क्षेत्रको क्षमता उपयोग गर्ने र त्यसबाट लाभ लिने गरी प्रक्रिया अघि बढाउन आवश्यक रहेको बताउनुभयो ।

अन्तरक्रियामा प्रस्तुतीकरण र जनप्रतिनिधिको जिज्ञासा मेट्दै सङ्घीय मामिला तथा स्थानीय विकास मन्त्रालयका सचिव दिनेशकुमार थपलियाले एकीकृत फोहोर व्यवस्थापनमा निजी क्षेत्रको सहभागिता गराउँदा हुने सम्झौता अमूर्त भाषामा लेखिनु नहुने विचार व्यक्त गर्नुभयो ।

फोहोर व्यवस्थापन कार्यमा फोहोर सङ्लग्न गरेर मात्र हुँदैन, सङ्कलित फोहोरलाई प्रशोधन गर्ने विधि र स्थानको व्यवस्थापन गरिने स्थानको वैज्ञानिक विकास तथा नगरपालिकाहरुले फोहोर व्यवस्थापन लिने नीति महत्वपूर्ण हुने धारणा राख्दै कामपाका कार्यकारी अधिकृत ईश्वरराज पौडेलले कार्य विभाजनमा नागरिक जिम्मेवारीसमेत किटान हुनु पर्ने बताउनुभयो ।

लगानी बोर्डका प्रमुख कार्यकारी अधिकृत महाप्रसाद अधिकारीले दिगो रुपमा फोहोर सङ्कलन र व्यवस्थानका लागि पछिल्लो समय केही उपलब्धि भए पनि यस बारे अझै धेरै काम बाँकी रहेको बताउनुभयो ।

कार्यक्रममा गोकर्णेश्वर नगरपालिका प्रमुख सन्तोष चालिसे, कागेश्वरी मनोहरा नगरपालिका प्रमुख कृष्णहरि थापाले काठमाडौँ उपत्यकामा निस्कने फोहोरमैला व्यवस्थापनका लागि दिगो रुपमा समाधान हुने उपाय अपनाउन आवश्यक रहेको विचार व्यक्त गर्नुभयो । रासस

No related posts.