काठमाडौँ, १२ मङ्सिर । फ्रान्सको राजधानी पेरिसमा सुरु भएको विश्व वातावरणीय सम्मेलन (कोप २१)को सन्दर्भ पारेर नेपालका विभिन्न स्थानमा युवाले ‘वातावरण संरक्षणमा लागाँै’ भन्ने नाराका साथ प्रदर्शन गरेका छन् ।
‘वातावरणलाई न्याय गरौँ’ भन्दै युवाले आज काठमाडौँ, पोखरा, हेटौँडा, चितवन, दमौली, बुटवल र लमजुङमा प्रदर्शन गरेका हुन् । विश्वव्यापी रुपमा नै वातावरण संरक्षणका लागि एकताबद्ध भएर दबाब दिनु जरुरी रहेको र पेरिस सम्मेलनले प्रष्ट अवधारणा सार्वजनिक गर्नुपर्नेमा जोड दिइएको छ ।
विश्व वातावरण सम्मेलन (कोप २१) यही नोभेम्बर ३० देखि डिसेम्बर ११ सम्म फ्रान्सको राजधानी पेरिसमा आयोजना हुँदैछ । प्रदर्शन विश्वका करिब ३०० सहरमा आज र भोलि गरिने आयोजकहरुले जनाएका छन् । सरकारलाई दबाब दिँदै स्पष्ट प्रक्रिया, स्पष्ट सम्झौता, स्पष्ट अंशियारी लिँदै सीमित हितका लागि वातावरणीय विषयलाई अगाडि बढाउनुपर्नेमा जोड दिइएको छ ।
नेपाल जलवायु परिवर्तनको असर पर्ने विभिन्न मुलुकहरुमध्ये चौथो स्थानमा रहेको छ । विश्वव्यापी रुपमा हरितगृह ग्यास उत्सर्जन गर्ने मुलुकहरुमध्ये असाध्यै तल रहे पनि नेपाल मारमा परेको छ । नेपालले ०.१ प्रतिशतमात्रै हरितगृह ग्यास उत्सर्जन गर्दै आएको छ ।
जलवायु परिवर्तनका कारण नेपालका हिमनदी पग्लिएका, हिमरेखा माथिसर्दै गएको, प्राकृतिक स्रोतहरुमा दबाब पर्दै आएका कारण नेपाल अन्यायमा पर्दै आएको छ । अन्तर्राष्ट्रिय सञ्चारमाध्यमहरुले सन् २०१५ सबैभन्दा बढी गर्मी वर्ष हुने सूचनाहरु सम्प्रेषण गरिरहेको अवस्थामा विश्व वातावरण सम्मेलनका क्रममा जलवायु परिवर्तन, त्यसले पारेको नकारात्मक प्रभावलाई कम गर्न ठूला र औद्योगिक राष्ट्रले समयमै ध्यान दिनुपर्नेमा जोड दिनुपर्नेछ । रासस
No comments:
Post a Comment