काठमाडौँ, २४ मङ्सिर । राष्ट्रपति विद्यादेवी भण्डारी ६७औँ अन्तर्राष्ट्रिय मानवअधिकार दिवसका अवसरमा प्रधानमन्त्री केपी शर्मा ओलीले आज अपराह्न सिंहदरबारमा आयोजना गर्नुभएको स्वागत समारोहमा सरिक हुनुभयो ।
समारोहमा उपराष्ट्रपति, प्रधानन्यायाधीश, सभामुख, पूर्वराष्ट्रपति, उपप्रधानमन्त्रीहरु, मन्त्रिपरिषद्का अन्य सदस्यहरु, व्यवस्थापिका–संसद्मा विपक्षी दलका नेता, पूर्वउपराष्ट्रपति र पूर्वप्रधानमन्त्रीहरुको उपस्थिति थियो ।
त्यसैगरी व्यवस्थापिका–संसद्का उपसभामुख, विभिन्न राजनीतिक दलका अध्यक्ष, राज्यमन्त्रीहरु, व्यवस्थापिका–संसद्को अन्तर्राष्ट्रिय श्रम तथा मानवअधिकार समितिका सभापति, राष्ट्रिय योजना आयोगका उपाध्यक्ष, सर्वोच्च अदालतका न्यायाधीश, सहायक मन्त्रीहरु, सांसद, संवैधानिक निकायका प्रमुख, महान्यायाधिवक्ता, प्रधानसेनापति, संसद् सचिवालयका महासचिव, मुख्य न्यायाधीश, संवैधानिक निकायका पदाधिकारी, नेपाल राष्ट्र बैंकका गभर्नर, नेपाल सरकारका सचिव तथा विशिष्ट श्रेणीका अधिकारी, सुरक्षा निकायका प्रमुख, राजधानीस्थित कूटनीतिक नियोग र नेपालको विकासका अन्तर्राष्ट्रिय साझेदार सङ्घसंस्थाका प्रमुख एवम् प्रतिनिधि, मानवअधिकारकर्मी र वरिष्ठ सञ्चारकर्मी समारोहमा सहभागी हुनुहुन्थ्यो ।
त्यस अवसरमा मुख्य सचिव डा सोमलाल सुवेदीले मानवअधिकारको संरक्षणका लागि संयुक्त राष्ट्र सङ्घले सन् १९४८ मा जारी गरेको मानवअधिकारसम्बन्धी अन्तर्राष्ट्रिय घोषणापत्रप्रति नेपाल सरकारको अटुट आस्था एवम् प्रतिबद्धता रहेको बताउनुभयो ।
गत महिना जेनेभामा भएको राष्ट्रसङ्घीय मानवअधिकार परिषद्को बैठकमा मानवअधिकारसम्बन्धी विश्वव्यापी आवधिक समीक्षामा नेपालले दोस्रो राष्ट्रिय प्रतिवेदन पेस गरेको जानकारी दिँदै उहाँले ७३ मुलुकले नेपालको मानवअधिकारको स्थितिलाई लिएर १४७ वटा सिफारिस गरेको बताउनुभयो । साथै उहाँले प्राप्त सिफारिस कार्यान्वयन गर्न नेपाल सरकार कटिबद्ध रहेको बताउनुभयो ।
मानवअधिकार संरक्षणका लागि सर्वोच्च अदालतका फैसला र राष्ट्रिय मानवअधिकार आयोगका सिफारिस कार्यान्वयन गर्ने प्रतिबद्धता पनि उहाँले व्यक्त गर्नुभयो । रासस
No comments:
Post a Comment