युग सुहाउँदो शिक्षाको खाँचो : पूर्वमन्त्री साउद

कञ्चनपुर, १६ माघ । नेपाली काँग्रेसका केन्द्रीय सदस्य तथा पूर्वमन्त्री नारायणप्रकाश साउदले दोदा नदीका सहायक नदीहरुमा तटबन्ध निर्माणको कार्यलाई निरन्तरता दिनका लागि पहल गर्ने बताउनुभएको छ ।

आज कञ्चनपुरको झलारी पिपलाडी नगरपालिका–७ मा रहेको श्रीकृष्ण माध्यमिक विद्यालयको वार्षिकोत्सव तथा अभिभावक दिवस उद्घाटन गर्नुुहुँदै उहाँले गुरुयोजनाअन्तर्गत दोदा नदीमा अधुरो तटबन्ध निर्माणको कार्यलाई अगाडि बढाउनका लागि प्रतिबद्ध रहेको बताउनुभयो ।

सनवोरा, स्याली र चुरेक्षेत्र भएर बग्ने नदीहरुले बर्सेनि वर्षात्का बेला विनाश निम्त्याउँदै आएकाले यसको रोकथामका लागि प्रयास गरिनु आवश्यक भएको उहाँले बताउनुभयो ।

वर्तमान समयमा युगसुहाउँदो गुणस्तरयुक्त शिक्षाको खाँचो रहेको धारणा उहाँले व्यक्त गर्नुभयो ।

शिक्षा गुणस्तरयुक्त नभए दक्ष जनशक्ति उत्पादन नहुने र देश विकासमा बाधा पर्ने भएकाले गुणस्तरीय शिक्षाका लागि वर्तमान शिक्षा प्रणालीमा आमूल परिवर्तन गर्न आवश्यक भएको उहाँले बताउनुभयो । रासस