प्रमको भारत भ्रमणपछि दुई देशबीचको सम्बन्ध थप सुदृढ हुन्छ – प्रवक्ता राई

काठमाडौँ, ७ फागुन । सरकारका प्रवक्ता सूचना तथा सञ्चारमन्त्री शेरधन राईले प्रधानमन्त्रीको भारत भ्रमणबाट दुई देशबीचको सम्बन्ध थप सुदृढ हुने बताउनुभएको छ ।
राष्ट्रिय समाचार समिति (रासस)को ५५औँ वार्षिकोत्सवका अवसरमा आज केन्द्रीय कार्यालय, भद्रकालीमा आयोजित विशेष कार्यक्रममा उहाँले दुई देशबीच विद्यमान असमझदारी हटाउन र भारतसँगको लामो समयदेखिको सम्बन्धलाई अझ सुमधुर एवम् सुदृढ बनाउन प्रधानमन्त्रीको भ्रमण केन्द्रित हुने बताउनुभयो ।
प्रधानमन्त्रीको भ्रमणमा विगतमा भएका समझदारीको कार्यान्वयनका मुद्दाले विशेष प्राथमिकता पाउने उहाँले बताउनुभयो । उहाँले भन्नुभयो, “दुई देशबीच भएका सम्झौता जस्ताको त्यस्तै कार्यान्वयन र नेपालको स्वार्थ र राष्ट्रिय हित प्रवद्र्धन भ्रमणको प्रमुख उद्देश्य हो ।”
भारतपछि प्रधानमन्त्रीले चीनको भ्रमण गर्ने जानकारी दिँदै उहाँले त्यसलाई उपलब्धिमूलक बनाउन गृहकार्य भइरहेको बताउनुभयो । चीन भ्रमणका बेला व्यापार र पारवहन सम्झौता एवम् इन्धनको व्यावसायिक कारोबारबारे सम्झौता हुने बताउनुभयो । मन्त्री राईले चीनसँग दीर्घकालीनरुपमा नयाँ नाका खोल्ने विषयमा पनि छलफल हुने बताउनुभयो ।
नेपाली काँग्रेसको महाधिवेशपछि नयाँ शिराबाट समझदारीका विषय अगाडि बढ्ने बताउँदै उहाँले संविधानको रक्षा र सफल कार्यान्वयनका लागि सङ्घीयताका बारेमा सबैसँग सहमति गरेर अगाडि बढ्ने दृढता व्यक्त गर्नुभयो ।
सरकारले वैशाख १२ को भूकम्प र अघोषित नाकाबन्दीको सामना गरेको बताउँदै मन्त्री राईले उच्चस्तरको सहमति भएर कार्यान्वयनमा आएको संविधान र त्यसको जगमा बनेको सरकारले जस्तोसुकै परिस्थितिको पनि सामना गर्ने स्पष्ट पार्नुभयो । रासस