गोलबजार (सिरहा), २९ फागुन । ‘दूरसञ्चार राजस्व ठगी’ मुद्दामा फरार रहेका वर्ड लिङ्क, लहानका तत्कालीन डाइरेक्टर राजकुमार श्रेष्ठलाई सिरहा प्रहरीले आज दिउँसो पक्राउ गरेको छ ।
गोलबजार नगरपालिका–७ का ३७ वर्षीय श्रेष्ठमाथि नेपाल टेलिकमले जिल्ला प्रहरी कार्यालय सिरहामा २०६७ असोज २० गते ‘दूरसञ्चार राजस्व ठगी’ मुद्दा दर्ता गरिएको थियो । मुद्दा दर्ता भएपछि लुकीछिपी बस्दै आएका श्रेष्ठलाई घरबाटै पक्राउ गरिएको इलाका प्रहरी कार्यालय गोलबजारका प्रहरी निरीक्षक सन्तोष निरौलाले जानकारी दिनुभयो ।
प्रहरी स्रोतका अनुसार पक्राउ परेका श्रेष्ठले ‘कल बाइपास’ गरी नेपाल टेलिकमको करोडौँको राजस्व चुहावट गरेका छन् । उनी पक्राउ परेपछि भोलि आइतबार आवश्यक कारबाहीका लागि जिल्ला प्रहरी कार्यालयमा बुझाउने प्रहरीले जनाएको छ । रासस
No comments:
Post a Comment