‘राज्यले प्रजातान्त्रिक आन्दोलनका योद्धालाई सम्मान गर्नुपर्छ’– दलका नेता

काठमाडौँ, १८ वैशाख । विभिन्न राजनीतिक दलका नेता तथा समाजसेवीले प्रजातान्त्रिक आन्दोलनका योद्धा रामप्रसाद राईलाई सरकारले राष्ट्रिय विभूति घोषणा गर्नुपर्ने माग गरेका छन् ।

रामप्रसाद राई फाउन्डेसनले यहाँ आज आयोजना गरेको २०७३ सालको शुभकामना आदानप्रदान तथा सम्मान कार्यक्रममा एकीकृत नेकपा (माओवादी)का स्थायी समिति सदस्य गोपाल किरातीले प्रजातान्त्रिक आन्दोलनमा अतुलनीय योगदान पु¥याउने रामप्रसाद राईलगायत अन्य व्यक्तिप्रति राज्यले बेवास्था गरेको भन्दै गुनासो गर्नुभयो ।

‘शोषणविरुद्ध हतियार उठाउने नीति लिने रामप्रसाद राईलगायत अन्य प्रजातान्त्रिक आन्दोलनका योद्धालाई सरकारले सहिद घोषणा गर्नुपर्छ, त्यसका लागि प्रजातन्त्रवादीले नै सशक्त आवाज उठाउनुपर्छ”– उहाँले भन्नुभयो । कवि भुपाल राई, प्रा लक्ष्मी राई र लेखक जय शिवाहाङ राईलेलगायतले रामप्रसाद राईको योगदानको कदर गर्दै सहिद घोषणा गर्नुपर्नेमा जोड दिनुभयो ।

फाउन्डेसनकी अध्यक्ष सुस्मा राईले रामप्रसाद राईबारे वास्तविक जानकारी गराउन विश्वविद्यालयका पुस्तकको पाठ्यक्रममा समावेश गर्नुपर्छ भन्नुभयो । कार्यक्रममा फाउन्डेसनद्वारा आयोजना गरिएको रक्तदान कार्यक्रममा रगत दान गर्ने करिब ३० जना रक्तदातालाई सम्मान गरिएको थियो । रासस