काठमाडौँ, २६ चैत । विसं २०४६ चैत २६ गते प्रजातन्त्र पुनःस्थापना भएको जनआन्दोलन दिवसलाई राजनीतिक दल र नेताले समेत बिर्सिँदै गएकामा नागरिक समाजका व्यक्तित्वले आपत्ति जनाएका छन् ।
गणेशमान सिंह अध्ययन प्रतिष्ठानले आज यहाँ आयोजना गरेको ‘२०४६ चैत २६, गणेशमान र संविधान कार्यान्वयनका चुनौती’ विषयक कार्यक्रमका वक्ताले यस्तो आपत्ति जनाएका हुन् ।
कार्यक्रममा नेपाली काँग्रेसकी कोषाध्यक्ष सीतादेवी यादवले संविधानमा संशोधन गर्ने विषय पहिल्यै समावेश गर्न सकेको भए कार्यान्वयनमा अहिले देखिएका चुनौती नआउने विश्वास व्यक्त गर्नुभयो । “संशोधन गर्ने विषय पहिल्यै समावेश गरौँ भनेर पटक पटक हामीले उठाएको मुद्दा कसैले सुनेन, यसैले अहिले समस्या आएको छ”–उहाँले भन्नुभयो ।
कानुनका ज्ञाता नीलाम्बर आचार्यले मुलुकमा राजनीतिक स्थिरताका लागि गणेशमान सिंह जस्ता स्वच्छ नेताको आवश्यक्ता खड्किएको बताउनुभयो । “जनआन्दोलनका बेला सर्वोच्च नेता सिंहले प्रतिष्पर्धी कम्युनिष्ट पार्टीलाई मिलेर आउनुस् भन्ने उदारता देखाउनुभयो”–उहाँले भन्नुभयो ।
काँग्रेस केन्द्रीय सदस्य एवम् प्रतिष्ठानका अध्यक्ष नवीन्द्रराज जोशीले चैत २६, २०४६ को परिवर्तनपछि नै नेपाली समाज लोकतान्त्रिक बनेको बताउनुभयो । “यसरी पुनःस्थापित भएको लोकतान्त्रिक व्यवस्थालाई वर्तमान सरकारले उपहास गर्ने काम गरेको छ, राजा आउनुपर्छ भन्ने र सङ्घीयता हुनुहुँदैन भनी वकालत गर्नेहरु नै अहिले उपप्रधानमन्त्री छन्”–उहाँले भन्नुभयो ।
कार्यक्रममा सांसद रामहरि खतिवडा, पूर्वमन्त्री होमनाथ दाहाल, मानव अधिकारवादी प्रा कपिल श्रेष्ठ, डा जगदीशचन्द्र पोखरेल, डा रामदयाल राकेश, रमेश गौतम, सिन्धुनाथ प्याकुरेललगायत नागरिक अगुवाले संविधानको कार्यान्वयनका लागि स्थिर राजनीतिक वातावरण निर्माण गरिनुपर्नेमा जोड दिनुभएको थियो । रासस
No comments:
Post a Comment