साहित्यकार शर्माको अन्त्येष्टि

काठमाडौँ, १८ वैशाख । दिवङ्गत साहित्यकार रामप्रसाद शर्मा ‘प्रदीप’ को आज पशुपति आर्यघाटमा अन्त्येष्टि गरियो ।

गएराति ६८ वर्षको उमेरमा हृदयघातका कारण निधन भएका प्रदीपको नेपाल प्रज्ञा–प्रतिष्ठानमा बिहान पार्थिव शरीर राखिएको जहाँ प्रधानमन्त्री केपी शर्मा आली, नेकपा (एमाले)का विभिन्न नेता तथा साहित्यकारले श्रद्धाञ्जलि दिनुभएको थियो ।

रेलिमाई सांस्कृतिक अभियानका संस्थापक उहाँ एमालेको पूर्व संस्कृति विभाग सदस्यका साथै राष्ट्रिय जनसांस्कृतिक महासङ्घ, प्रगतिशील लेखक सङ्घलगायत संस्थामा आबद्ध हुनुहुन्थ्यो । उहाँ जनक शिक्षा सामग्री केन्द्र लिमिटेडका पूर्व प्रबन्ध सञ्चालक पनि हुनुहुन्थ्यो ।

विसं २००४ साउन १ मा अर्घाखाँचीको पोखराथोकमा होमनाथ उपाध्याय र हरिकला पौडेलको कोखबाट जन्मनुभएका शर्माका श्रीमती र दुई छोरा छन् । रासस