जीवनप्रतिको नवीनतम दृष्टिकोण ‘जीवन स्पर्श’

कावासोती, १ साउन । कवि जीवन सापकोटा ‘युगिन’को जीवन स्पर्श कृति जीवनप्रतिको नवीनतम दृष्टिकोण भएको समीक्षकले बताएका छन् । गैँडाकोटमा शनिबार सार्वजनिक गरिएको जीवन स्पर्श कविता सङ्ग्रहको समीक्षा गर्दै उनीहरुले यस्तो धारणा राखेका हुन् ।

कविले मानवीय जीवनलाई ‘फ्यूजन आर्ट’का रुपमा हेरेका छन् जुन विभिन्न गति, पदार्थ, चेतना, तत्व र धाराहरुको योगबाट सङ्गठित भएर निर्मित हुन्छ र असङ्गत–विपरीत तत्वहरुको मिलनबिन्दु वा मध्यबिन्दुका रुपमा परिभाषित गरिएको छ, डा धनेश्वर भट्टराईले भन्नुभयो – “स्वतन्त्र, सम्पन्न र समृद्ध राष्ट्रको नागरिक बन्ने मोहले कवि निथ्रुक्क भिजेका छन् ।”

ज्ञानको क्षेत्रको जिज्ञासामा संशय जरुरी छ त्यो जीवन स्पर्शमा छ नेपाल प्रज्ञा–प्रतिष्ठानका प्राज्ञ अमर गिरीले भन्नुभयो – “फ्यूजन आर्टको परिभाषा सैद्धान्तिक रुपमा आवश्यक छ त्यसमा कविले जोड गर्नुपर्छ ।”

कवि जीवन सापकोटा ‘युगिन’ ले परस्पर दुई धाराहरुको सन्तुलित फ्यूजन प्रक्रियाभित्र मध्यबिन्दु स्वरुपमा नयाँ गति, पदार्थ र चेतना निरुपित हुन्छ भने तीनै दुई धाराहरुको असन्तुलित प्रक्रियाभित्र विलय र ध्वंशजस्ता आधारभूत संरचनाहरु सङ्गठित हुन पुग्छन् ती सङ्घटनाहरु मानवीय चेतनलाई सृष्टि चक्रसँग तालमेल गराउँछ त्यसैको आधारमा कविता सङ्ग्रह ल्याएको बताउनुभयो ।

कार्यक्रममा त्रिभुवन विश्वविद्यालयका डा नेत्र एटम, समालोचक डा एकनारायण पौडेल, डा केशव चालिसे, वरिष्ठ गीतकार प्रेमविनोद नन्दन, सरिता तिवारी, सरस्वती तिमिल्सेनालगायतका कविता सङ्ग्रह नयाँ स्वादमा रहेको बताउनुभएको थियो ।

मध्यबिन्दु प्राज्ञ–प्रतिष्ठानद्वारा प्रकाशित १२९ पृष्ठको यो सङ्ग्रहमा ६० वटा कविता रहेका छन् । रासस

No related posts.