यमनी सीमातर्फबाट साउदी अरेबियामा गोली प्रहार गोलीलागेर तीन जनाको मृत्यु

रियाद, १४ मङ्सिर । साउदी अरेबियाको सीमा क्षेत्रमा यमनको तर्फबाट आइतबार भएको गोली प्रहारमा एक सीमा सुरक्षा गार्ड र तीन जना स्थानीय बासिन्दाको मृत्यु भएको अधिकारीहरुले जनाएका छन् ।

आइतबार बिहान दहरन अल जानुब यमनी क्षेत्रबाट भएको भीषण गोली प्रहारमा एक सीमा गार्डको मृत्यु भएको गृह मन्त्रालयले घोषणा गरेको छ ।

यसैगरी जजान क्षेत्रमा भएको गोली प्रहारबाट दुई यमनी स्थानीय बासिन्दाको मृत्यु भएको नागरिक प्रतिरक्षा मन्त्रालयले जनाएको छ ।

हुथी विद्रोहीको विरुद्धमा साउदी अरेबियाले हवाई आक्रमण सुरु गरेयता साउदी अरेबियाको सीमा क्षेत्रमा करिब ८० जनाको गोली प्रहारमा हत्या भइसकेको छ ।

हताहती हुनेहरुमा प्राय सैनिक रहेका जनाइएको छ । यमनी क्षेत्रबाट सो हमला निरन्तर रुपमा हुने गरेको पनि समाचारमा उल्लेख गरिएको छ ।

यमनमा मार्चदेखि हालसम्म भएका हिंसाहरुमा पाँच हजार ७०० भन्दा बढी व्यक्तिको मृत्यु भइसकेको संयुक्त राष्ट्रसङ्घले जनाइको छ ।

सो सङ्ख्यामा आधा भन्दा बढी सर्वसाधारण रहेका बताइएको छ । रासस÷एएफपी

विद्यमान समस्याको चाँडो समाधान गर्न चेम्बरको माग

काठमाडौँ, १४ मङ्सिर । मधेस केन्द्रित दलको बन्दसँगै चर्किएको अघोषित नाकाबन्दीले मुलुकको अर्थतन्त्र तहसनहस भई दैनिक जनजीवन गम्भीररुपमा प्रभावित भएकाले चाँडो समस्याको समाधान गर्न नेपाल चेम्बर अफ कमर्सले माग गरेको छ ।

आज यहाँ पत्रकारसम्मेलन आयोजना गरी विषम परिस्थितिमा सरकारले समस्याको समाधानको पहलमा लाग्नुपर्ने र आन्दोलनरत दलहरु जिम्मेवार भएर अगाडि बढ्न चेम्बर अफ कमर्सले जोड दिएको हो ।

“अहिले विषम परिस्थितिको यथाशीघ्र समाधान होस् भन्ने जोड्दार माग गर्दछौँ” चेम्बरका अध्यक्ष राजेशकाजी श्रेष्ठले भन्नुभयो । उहाँले नाकाबन्दीले बैंक तथा वित्तीय संस्थासमेत जोखिमयुक्त हुने र सामाजिक एवम् आर्थिक विकृति मौलाउने भएकाले त्यसतर्फ सबै सचेत हुनुपर्ने बताउनुभयो ।

सरकारले जारी गरेको श्वेतपत्रले देशको वर्तमान अवस्थालाई सम्बोधन गर्न नसकेको उल्लेख गर्दै उहाँले भन्नुभयो, “श्वेतपत्रमा वर्तमान अवस्थाको विश्लेषण मात्र गरिएको छ, यो अवस्था सिर्जना गर्ने वास्तविक कारणहरु र समस्या समाधानबारे स्पष्ट गर्न सकेको छैन ।”

बन्द र नाकाबन्दीले देशको अर्थतन्त्र झन्डै एक दशकपछि परेको र चालु आवको आर्थिक वृद्धिदर नकारात्मक हुने स्पष्ट भइसकेको अवस्थामा चाँडो समस्याको समाधानतर्फ लाग्नुपर्नेमा अध्यक्ष श्रेष्ठले जोड दिनुभयो ।

त्रिपक्षीय वार्ता सकारात्मक, निर्णायक वार्ता पर्सि हुने

काठमाडौँ, १४ मङ्सिर । लामो समयपछि आज भएको सत्तारूढ दलहरु, प्रमुख प्रतिपक्षी दल र आन्दोलनकारी दलहरुबीचको त्रिपक्षीय वार्ता सकारात्मक दिशामा अघि बढेको छ ।

सत्तारूढ गठबन्धन दलहरु नेकपा (एमाले), एकीकृत नेकपा (माओवादी), राष्ट्रिय प्रजातन्त्र पार्टी नेपाल, मधेसी जनाधिकार फोरम (लोकतान्त्रिक), प्रमुख प्रतिपक्षी दल नेपाली काँग्रेस र संयुक्त लोकतान्त्रिक मधेसी मोर्चाका शीर्ष नेताहरुबीच आज भएको छलफल सकारात्मक दिशामा अघि बढेको नेताहरुले बताएका छन् ।

प्रतिपक्षी दलका नेता एवम् काँग्रेसका सभापति सुशील कोइरालाले वार्ताका बारेमा संक्षिप्त प्रतिक्रिया दिँदै छलफल सकारात्मक भएको र मोर्चाले राखेको ११ बुँदे मागका सम्बन्धमा प्रमुख दलहरुबीच गहन छलफल गरी यही मङ्सिर १६ गते पुनः अर्को वार्ता हुने जानकारी दिनुभयो ।

एमालेका वरिष्ठ नेता माधवकुमार नेपालले मुलुकको वर्तमान समस्या हल गर्न सबै दल संवेदनशील देखिएको र समस्यालाई सुल्झाउन सरकार तथा आन्दोलनकारीबाट भएका दमन तथा हिसांत्मक गतिविधि रोक्नपर्छ भन्नेमा सहमति भएको बताउनुभयो । बैठकमा आफूले तत्काललाई केही समयका लागि प्रदेशको सीमाङ्कनको विषयलाई थाती राखेर अघि बढे समस्या हल गर्न सहज हुने धारणा राखेको उहाँले जानकारी दिनुभयो ।

उपप्रधानमन्त्री एवम् एमालेका उपाध्यक्ष भीम रावलले छलफलमा सबै दलका नेताले आफ्ना भावना व्यक्त गरेको र प्रधानमन्त्री केपी शार्मा ओलीले वार्तालाई सार्थक परिणाममा पुग्ने गरी छलफल अघि बढाउन सबैलाई लचकताका साथ प्रस्तुत हुन आग्रह गरेको जानकारी दिनुभयो ।

बैठकमा एमाओवादीका उपाध्यक्ष नारायणकाजी श्रेष्ठले मोर्चाका राजनीतिक मागका सम्बन्धमा प्रमुख दलले आन्तरिक र आपसमा छलफल गरी पर्सि १६ गते अर्काे बैठक बस्ने सहमति भएको बताउनुभयो ।

सङ्घीय समाजवादी फोरम नेपालका वरिष्ठ नेता अशोक राईले वार्ता निरन्तर जारी राख्ने निर्णय भएको जानकारी दिँदै सीमाङ्कनको विषय बैठकमा प्रवेश नभएको बताउनुभयो । उहाँले आन्दोलनमा देखिएको दमन अविलम्ब रोक्ने बारेमा सहमति भएको जानकारी दिनुभयो ।

सद्भावना पार्टीका सहअध्यक्ष लक्ष्मणलाल कर्णले वार्तामा मधेसको अवस्था सहज गर्नेबारेमा गम्भीररुपमा छलफल भएको जानकारी गराउँदै सरकारले वार्ताको वातावरण बनाउन यसअघि गरेको घाइतेको उपचार र आन्दोलनमा मृत्यु भएकालाई राहत दिने निर्णय कार्यान्वयन हुनुपर्ने माग राखेको बताउनुभयो ।

बैठकमा प्रधानमन्त्री केपी शर्मा ओलीले आन्दोलनकारीको मागमा गहन छलफल गरी वार्ताबाट निकास निकाल्ने प्रतिबद्धता व्यक्त गर्नुभएको नेताहरुले बताएका छन् । मोर्चाका नेताहरुले आफ्ना मागका बारेमा साझा धारणा बनाउन प्रमुख दललाई आग्रह गरेको र छिटो निकास निकाल्ने कुरामा सबै पक्ष लचकताका साथ बस्ने प्रतिबद्धता व्यक्त भएको बताइएको छ ।

बैठकमा प्रधानमन्त्री एवम् एमालेका अध्यक्ष ओली, वरिष्ठ नेता नेपाल, नेता झलनाथ खनाल, काँग्रेस सभापति कोइराला, वरिष्ठ नेता शेरबहादुर देउवा, उपसभापति रामचन्द्र पौडेल, एमाओवादीका अध्यक्ष पुष्पकमल दाहाल, उपाध्यक्ष श्रेष्ठ, राप्रपा नेपालका अध्यक्ष कमल थापा, फोरम लोकतान्त्रिकका अध्यक्ष विजयकुमार गच्छदार, मोर्चाका तर्फबाट तमलोपाका अध्यक्ष महन्थ ठाकुर, सङ्घीय समाजवादीका वरिष्ठ नेता राई, सद्भावनाका सहअध्यक्ष कर्णलगायतको सहभागिता थियो ।

साढे आठ हजार जारी फिर्ता गरेपछि…

भीमदत्तनगर, १४ मङ्सिर । कञ्चनपुरको भीमदत्तनगरपालिका–१९ बागफाँटाकी २० वर्षीया जेनिशा राना आइतबार दिउँसोपछि प्रफुल्ल मुद्रामा भेटिनुभयो । डेढ दशकअघि जेनिशाको देखतभूली गाविसका रामवकस रानासँग विवाहका लागि स्वयम्बर भएको रहेको छ । आफ्नो इच्छा विपरीत बुवा–आमाले बाल्यावस्थामै गरेको स्वयम्बरलाई सहमतिअनुसार तोडेपछि जेनिशाको खुसीको सीमा नै रहेन ।

चेतनास्तर बढ्दै गएसँगै जेनिशाले आइतबार आफ्नो समुदायको परम्पराअनुसार रामवकससँग विवाह नगर्ने निधो अनुरुप स्वयम्बरलाई ‘ब्रेक’ लगाउनुभयो । “हाम्रो समुदायमा बाल्यकालमै स्वयम्बर हुन्छ”–जेनिशाले रासससँग भन्नुभयो–“पछिल्ला वर्षमा तत्काल स्वयम्बर गरेर विवाह गर्ने प्रचलन भएकाले मैले पनि पुरानो स्वयम्बरलाई इन्कार गरेकी हुँ ।”

“डेढ दशकअघि घरमा स्वयम्बर गर्न आउँदा केटा पक्षले लड्डु, मिठाइ खुवाएर भोज गराएको रहेछ”–उहाँले भन्नुभयो, “हामीले स्वयम्बरलाई तोडेपछि रु साढे आठ हजार स्वयम्बर खर्च (जारी) बुझायौँ ।” राना थारु समुदायमा परिवारले स्वयम्बर गरेको केटासँग विवाह नगरेर स्वयम्बरमा लागेको खर्च फिर्ता गर्नुपर्ने प्रावधान अनुरुप आइतबार जेनिशाका बुवा रामचन्द्रले सो रकम फिर्ता गर्नुभयो ।

“छोरीले हामीले स्वयम्बर गरेको केटासँग विवाह गर्न नै मानिनन्”–रामचन्द्रले भन्नुभयो, “अब छोरीको इच्छा विपरीत कसरी विवाह गर्न लगाउँ भनेर कर गरिन् ।” स्वयम्बरलाई यो समुदायको चलचल्तीको भाषमा ‘मङ्गनी’ भनिन्छ ।

“बीस वर्ष उमेर पुगिसक्दा पनि अहिलेसम्म मैले स्वयम्बर गरेको केटालाई देखिन”–जेनिशाले भन्नुभयो, “केटाको बारेमा सामान्य जानकारी नै नभई कसरी स्वयम्बरकै आधारमा बिहे गर्नु ?” उहाँले अब असल केटा पाए बिहे गर्ने योजनासमेत सुनाउनुभयो । दुई पक्षको आपसी लेनदेनपछि आइतबारबाट उनीहरुको मित्रताको सम्बन्ध टुटेको छ । “हामीले सहमतिमै विवाह नगर्ने निर्णय गरेका हौँ”–रामचन्द्रले भन्नुभयो, “अन्तिमपटक केटाको बुबाले छोरीकै मुखबाट इन्कार गरेको सुनेपछि सहमतिमा सामेल हुनुभयो ।”

देखतभुलीका रामवकस वैदेशिक रोजगारीको सिलसिलामा तीन वर्षदेखि कतारमा हुनुहुन्छ । आइतबार उहाँका दाइ र बुबासहित गाउँका मान्यजनसहितको टोली जेनिशाको घरमा पुगेर स्वयम्बरमा लागेको खर्च लिएर फिर्ता भएको छ ।

सुदूरपश्चिममा राना थारु समुदायको बाहुल्यता रहेको कञ्चनपुरमा यो समुदायले छोरा छोरीको बाल्यकालमै विवाह कोसँग गर्ने ? भनेर निधो गरिसकेका हुन्छ । “पहिले त गर्भमै पनि छोरा–छोरी भए विवाह गर्ने छोरा–छोरा भए मितेरी लगाउने प्रथा नै थियो”–भीमदत्तनगरपालिका–१९ बागफाँटाका पूर्व भलमन्सा सेन रानाले भन्नुभयो, “आजकाल त हाम्रो समुदाय पनि शिक्षित हुँदै गयो, यो प्रथा पनि हट्दैछ ।” रासस

निर्वाचनसम्बन्धी लैङ्गिक तथा समावेशी नीति कार्यान्वयनका लागि राजनीतिक प्रतिबद्धताको खाँचो

काठमाडौँ, १४ मङ्सिर । निर्वाचन आयोगका आयुक्त ईला शर्माले निर्वाचनसम्बन्धी लैङ्गिक तथा समावेशी नीति कार्यान्वयनका लागि राजनीतिक प्रतिबद्धताको खाँचो औँल्याउनुभयो ।

लैङ्गिक हिंसाविरुद्धको १६ दिने अन्तर्राष्ट्रिय अभियान चलिरहँदा निर्वाचन आयोगले आज आयोजना गरेको ‘निर्वाचन तथा राजनीतिमा महिला सहभागिता एवम् निर्वाचन प्रक्रियामा हुने लैङ्गिक हिंसा’ विषयक अन्तरक्रियामा उहाँले निर्वाचन प्रक्रिया महिलामैत्री बनाउन ल्याएको उक्त नीति कार्यान्वयनमा राजनीतिक दलको सहयोग आवश्यक रहेको बताउनुभयो ।

आयोगले लैङ्गिक तथा समावेशी नीतिका अतिरिक्त पाँचवर्षे लैङ्गिक तथा समावेशी रणनीति–२०७२, लैङ्गिक तथा समावेशी कार्ययोजना ल्याएको छ । यसैगरी आयोगले लैङ्गिक तथा समावेशीकरण समन्वय समिति, लैङ्गिक तथा समावेशी इकाई, आयोग र जिल्ला निर्वाचन कार्यालयमा लैङ्गिक सम्पर्क बिन्दुको स्थापना गरेको छ ।

आयोगका सचिव शारदाप्रसाद त्रितालले निर्वाचनसँगै महिला हिंसाका घटना पनि आउने बताउँदै निर्वाचनमा समानुपातिक सहभागिताका कुरा आए पनि महिलाको हकमा त्यो लागू हुन नसकेको स्वीकार्नुभयो ।

कार्यक्रममा आयोगका सह–सचिवद्वय वीरबहादुर राई र सूर्यप्रसाद शर्माले कार्यपत्र प्रस्तुत गर्दै २०७० सालको निर्वाचनमा आठ प्रतिशत महिलालाई मतदान गर्न अवरोध पुगेको, दुई प्रतिशत मतदान केन्द्रमा महिलामाथि हिंसा भएको, २६ प्रतिशत मतदान केन्द्रबाट महिलाले मतदान नगरी फर्केको तथ्याङ्क प्रस्तुत गर्दै मतदान केन्द्रलाई महिलामैत्री बनाउने कार्यक्रम ल्याउनुपर्ने आवश्यकता औँल्याउनुभयो ।

संसद्मा प्रतिनिधित्व गर्ने महिलामा विसं २०४८ मा आठ, २०५१ सालमा छ, २०५६ सालमा १२ र अन्तरिम संविधानसभामा ५७ जना थिए । रासस

‘संविधान संशोधन प्रक्रिया अघि बढाउनुपर्ने’

पाँचथर, १४ मङ्सिर । नेपाली काँग्रेसका नेता नरहरि आचार्यले मुलकको आन्तरिक समस्या हल गर्नु नै अहिलेको उत्तम विकल्प रहेको बताउनुभएको छ ।

फिदिममा आज सञ्चारकर्मीसँग कुराकानी गर्दे उहाँले संविधानप्रति असन्तुष्ट दलसँग संवाद गर्दै संविधान संशोधन प्रक्रिया अघि बढाउनुपर्ने बताउनुभयो । संविधान गतिशिल दस्तावेज भएको उल्लेख गर्दै उहाँले समयको गतिशीलतासँगै संशोधन गर्न सकिने बताउनुभयो ।

उहाँले संविधान संशोधन प्रक्रिया यथाशक्य अघि बढाउनुपर्नेमा जोड दिनुभयो । छ महिनाभित्र सङ्घीय आयोग गठन भइसक्ने र त्यसले सीमाकङ्नको विषयलाई एक वर्षभित्रमा टुङ्ग्याइसक्ने उहाँको भनाइ थियो । रासस

सत्र वर्ष कैद भुक्तान गर्न बाँकी बलात्कारी पक्राउ

धादिङ, १४ मङ्सिर । जबर्जस्ती करणी र हाडनाता करणी मुद्दामा १७ वर्ष कैद सजाय पाएर फरार भएका अपराधीलाई जिल्ला प्रहरी कार्यालयले पक्राउ गरेको छ ।

धादिङ जिल्ला अदालतबाट २०६९ साल असार २२ गतेको फैसलाअनुसार मैदी गाविस–२ का ५२ वर्षीय रुद्रमान श्रेष्ठलाई आइतबार जिल्ला प्रहरी कार्यालयले पक्राउ गरेको हो । प्रहरीले पक्राउपछि आज जिल्ला अदालतमा पेस गरी जिल्ला कारागारमा १७ वर्ष जेल भुक्तानका लागि चलान गरेको प्रहरी नायब उपरीक्षक सबिन प्रधानले जानकारी दिनुभयो ।

श्रेष्ठले आफ्नै नातिनीलाई जबर्जस्ती करणी गरेपछि जिल्ला अदालतले उनलाई १७ वर्ष कैद भुक्तान गर्न आदेश गरेको थियो । रासस

कोरला नाकाको अध्ययन गर्न संसदीय टोली सीमा क्षेत्र जाँदै

मुस्ताङ, १४ मङ्सिर । चीनसँग सीमा जोडिएको मुस्ताङको छोसेर गाविसमा पर्ने कोरला नाका सञ्चालनको सम्भाव्यता अध्ययन गर्न संसदीय टोली मुस्ताङ आइपुगेको छ ।

व्यवस्थापिका–संसद्का विकास समितिका सभापति रवीन्द्र अधिकारीको नेतृत्वमा समितिका सदस्य, धौलागिरि अञ्चलका सांसद, मुस्ताङका प्रमुख जिल्ला अधिकारी र सुरक्षा अधिकारीसहितको टोलीले नाका सञ्चालन गर्न सकिने वा नसकिने, भौतिक पूर्वाधार, सडकको अवस्थाका विषयमा विस्तृत अध्ययन गर्नेछ । आज उपल्लो मुस्ताङ हिँडेको टोलीले दुई दिन नाकाको सम्पूर्ण अध्ययन गर्ने र स्थानीयवासीसँग छलफल गर्ने कार्यक्रमसमेत तय भएको छ ।

अघोषित भारतीय नाकाबन्दीका कारण देशभरको जनजीवन अस्तव्यस्त बनिरहेको सन्दर्भमा चीनसँग सीमा जोडिएको उक्त नाका सञ्चालन गर्न सके इन्धन, दैनिक उपभोग्य वस्तु तथा निर्माण सामग्री त्यसैबाट आयात–निर्यात गर्न सकिने अवस्था छ ।

मुस्ताङलगायत धौलागिरि अञ्चलका उद्योगी व्यवसायी, नागरिक समाज, स्थानीयसवासी लगायतको हालै बेनीमा सम्पन्न बृहत् छलफलले नाका सञ्चालन गर्न सके देशलाई दीर्घकालीन रुपमा धेरै फाइदा हुने निष्कर्ष निकालेका थिए । १२ वर्षअघि सम्म सञ्चालनमा रहेको नाका चिनियाँ पक्षले सुरक्षाको कारण देखाउँदै बन्द गरेको छ ।

उपल्लो मुस्ताङका ६ गाविसका सर्वसाधारणलाई निर्बाध आवतजावतको व्यवस्था भएपछि पछिल्लो समय चिनियाँ पक्षले नाकामा एकदमै कडा बनाएको छ ।

नाकानजिकै अत्याधुनिक हतियारसहितका सुरक्षा क्याम्प राखेर सिसी क्यामेरामार्फत निरन्तर निगरानी बढाएको छ ।

मुस्ताङका प्रमुख जिल्ला अधिकारी गणेशबहादुर अधिकारीले संसदीय टोलीले सम्पूर्ण विषयको अध्ययन गरेर सरकारलाई प्रतिवेदन दिने बताउनुभयो । टोलीमा समितिका सदस्य, बाग्लुङका संसद् प्रकाश पौडेल, मुस्ताङका श्रीमायाँ थकालीलगायतका व्यक्ति सहभागी हुनुहुन्छ । रासस

केन्द्रीय रक्तसञ्चार केन्द्र ललितपुरमा सर्ने

काठमाडौँ, १४ मङ्सिर । काठमाडौँको भृकुटीमण्डपमा नेपाल रेडक्रस सोसाइटीद्वारा सञ्चालित केन्द्रीय रक्तसञ्चार केन्द्र ललितपुरको बालकुमारीमा सर्ने भएको छ ।

गत वैशाख १२ गते गएको भूकम्प र त्यसपछिका पराकम्पनले केन्द्रमा क्षति पु¥याएपछि सो केन्द्र ललितपुरस्थित रेडक्रसको जिल्ला शाखामा सर्न लागेको हो । केन्द्रका वरिष्ठ मेडिकल अधिकृत डा प्रकाशकुमार यादवले केन्द्र यही महिनाको अन्त्यसम्म ललितपुरमा सर्ने जानकारी दिनुभयो ।

उहाँले भन्नुभयो—“भूकम्पलगत्तै तीन महिना नेपाल पुलिस क्लबबाट सेवा दिँदै आएकामा पछि आफ्नै केन्द्रको प्राङ्गणमा त्रिपालमुनि बसेर सेवा दिएका छौँ ।”

पचास वर्ष लामो इतिहास बोकेको केन्द्रीय रक्तसञ्चार केन्द्रले सुरुका दिनमा वीर अस्पतालबाट सेवा दिँदै आएको भए पनि २०३९ सालमा भृकुटीमण्डपबाट सेवा दिँदै आएको थियो ।

भूकम्पले केन्द्रको भवनमा पूर्ण क्षति पुगेपछि भवन निर्माणका लागि तीन वर्षलाई केन्द्र ललितपुरमा सर्न लागेको हो । अन्तर्राष्ट्रिय रेडक्रसको सहयोगमा तीनतले भवन निर्माण भएपछि केन्द्र पुनः भृकुटीमण्डमा नै फर्कने यादवले जानकारी दिनुभयो । रासस

मोङ्गला बन्दरगाह नेपाललाई प्रयोग गर्न अनुमति दिन सकिन्छ – राजदूत शाम्स

काठमाडौ, १४ मंसिर। नेपालका लागि बङ्गलादेशका राजदूत मास्फी बिन्ते शाम्सले बङ्गलादेशको चटगाउँ र मोङ्गला बन्दरगाह नेपाललाई प्रयोग गर्न अनुमति दिन सकिने बताउनुभएको छ ।

रिपोर्टर्स क्लबमा आज आयोजित साक्षात्कारमा राजदूत साम्सले मास्फी विन्ते साम्सले नेपालमा आपूर्ति व्यवस्थापनमा असहज स्थिति पैदा भएपछि एक नेपाली प्रतिनिधिमण्डलले हालै बङ्गलादेशको भ्रमणमा गएको स्मरण गर्दै उक्त कुरा बताउनुभएको हो ।

बङ्गलादेशको नेपालसँगको सम्बन्ध सौहार्द रहिआएको बताउँदै उहाँले नेपालमा हालै आएको भूकम्पबाट प्रभावितहरुलाई बङ्गलादेश सरकारका तर्फबाट सक्दो सहयोग उपलब्ध गराएको जानकारी दिनुभयो ।

उहाँका अनुसार नेपालका भूकम्पपीडितलाई एक करोड २० लाख अमेरिकी डलर बराबरको सहयोग उपलब्ध गराइएको थियो ।

गत वर्ष बङ्गलादेशले ६० लाख अमेरिकी डलर बराबरको विद्युतीय सामग्री, लुब्रिकेन्ट्सलगायतका ४० वटा उत्पादन नेपालतर्फ निर्यात गरेको जानकारी पनि उहाँले दिनुभयो । रासस

मधेस केन्द्रित दलले काँग्रेसको झन्डा जलाए

पर्सा, १२ मङ्सिर । मधेस आन्दोलनको विषयलाई लिएर नेपाली काँग्रेस नगर कार्यसमिति वीरगन्जले आज यहाँ निकालेको जुलुसमा सङ्घीय समावेशी गठबन्धनका कार्यकर्ताले हस्तक्षेप गरी काँग्रेस पार्टीको झन्डा जलाएका छन् ।

वीरगन्जको माइस्थान चोकबाट नगर कार्यसमितिले निकालेको जुलुस नगर परिक्रमा गरी माइस्थान पुग्दा गठबन्धनका नेता कार्यकर्ताले काँग्रेसका कार्यकर्ताको हातबाट झन्डा र ब्यानर खोसी आगो लगाएका हुन् ।

नेपाल सद्भावना पार्टीका केन्द्रीय सदस्य शिवप्रसाद पटेलले जारी मधेस आन्दोलनमा कुनै पनि पार्टीको झन्डा प्रयोगमा रोक लगाइएकाले काँग्रेसको झन्डामा आगो लगाइएको बताउनुभयो ।

यता काँग्रेसका नगर सभापति महम्मद सहाबुदिनले लामो समयदेखि चल्दै आएको मधेसको मागलाई सम्बोधन गर्न सरकारमाथि दबाब दिने उद्देश्यका साथ निकालिएको जुलुसमा मधेस केन्द्रित दलका नेता कार्यकर्ताले हस्तक्षेप गरी पार्टीको झन्डा जलाएर निन्दनीय कार्य गरेको बताउनुभयो । रासस

संसद्मा दर्ता गरेको संशोधन प्रस्ताव पारित गर्नुपर्ने काँग्रसको निष्कर्ष

काठमाडौँ, १३ मङ्सिर । नेपाली काँग्रेसले यसअघिको आफू नेतृत्वको सरकारले संसद्मा दर्ता गरेको समानुपातिक र समावेशीसम्बन्धी संविधान संशोधन प्रस्ताव तत्काल पारित गर्नुपर्ने निष्कर्ष निकालेको छ ।

काँग्रेस पदाधीकारीको आज बसेको बैठकले सोमबार हुने सत्तारुढ दल, प्रमुख प्रतिपक्षी दल काँग्रेस र आन्दोलनरत दल सम्मिलित त्रिपक्षीय वार्तामा पार्टीले राख्ने कार्यसूचीबारे छलफल गरेको थियो ।

बैठकपछि काँग्रेस प्रवक्ता दिलेन्द्र बडूले भन्नुभयो, “मधेस आन्दोलनको प्याकेजमै समाधान खोजे ढिलो हुन्छ, त्यसैले तत्काललाई संसद्मा दर्ता भएको प्रस्ताव पारित गर्ने र सीमाङ्कनका विषमा राजनीतिक तहमा थप वार्ता र संवादमार्फत सहमति खोज्नुपर्छ ।”

आजको बैठकमा सभापति सुशील कोइरालाले शुक्रबार आन्दोलनरत तराई मधेस लोकतान्त्रिक पार्टीका अध्यक्ष महन्थ ठाकुर, शनिबार एकीकृत नेकपा (माओवादी)का अध्यक्ष पुष्पकमल दाहालसँग भएको छलफलबारे जानकारी गराउनुभएको थियो ।

बैठकले सोमबारको त्रिपक्षीय वार्तामा सभापति कोइराला, वरिष्ठ नेता शेरबहादुर देउवा र उपसभापति रामचन्द्र पौडेल सहभागी हुने निर्णय गरेको छ ।

काँग्रेसले शनिबार वीरगञ्जमा पार्टीको कार्यक्रममा मधेसवादी पार्टीले आक्रमण गरी पार्टीको झन्डा जलाउने कार्य गरेकामा त्यसको भत्र्सना गरेको छ ।

सभापति कोइराला र राजदूत रायबीच भेटवार्ता

काँग्रेस सभापति सुशील कोइराला र नेपालका लागि भारतीय राजदूत रणजीत रायबीच आज भेटवार्ता भएको छ ।

राजदूत राय सभापति कोइरालालाई भेट्न उहाँको निवास महाराजगञ्ज पुग्नुभएको थियो ।

भेटमा कोइरालाले भारतद्वारा गरिएको अघोषित नाकाबन्दीका कारण नेपालीको जनजीवन कष्टकर बन्दै गएको भन्दै तत्काल नाकाबन्दी फिर्ता लिन आग्रह गर्नुभएको काँग्रेस प्रवक्ता बडूले जानकारी दिनुभयो ।

सभापति कोइरालाले अहिलेको अवस्थाले दुई देशबीचको सदियौँदेखिको सम्बन्ध बिगार्ने र कसैको हितमा नहुने बताउनुभएको थियो ।

उहाँले मधेसमा जारी आन्दोलनको समाधानका लागि आफूहरु प्रयासरत रहेको राजदूतलाई जानकारी दिँदै छिट्टै सहमति हुने बताउनुभएको थियो । रासस

वार्ताबाट समस्याको हल गर्न परिषद्को सुझाव

काठमाडौँ, १३ मङ्सिर । नेपाल विश्व सम्बन्ध परिषद्ले तराई मधेसमा जारी बन्द, हडताल र अवरोध कसैको हितमा नरहेकोले सबै पक्ष मिलेर वार्तामार्फत समस्याको निकास खोज्न सबैलाई आग्रह गरेको छ ।

छ दशक लामो नेपाली जनताको चाहनाअनुसार गत असोज ३ गते जारी भएको संविधानका राम्रा पक्षलाई ओझेलमा पारी केही नराम्रा पक्षलाई मात्र अगाडि ल्याएर संविधानलाई कमजोर पार्न खोजिएको परिषद्को ठहर छ ।

परिषद्द्वारा आज प्रकाशित विज्ञप्तिमा भनिएको छ, “संविधान असंशोधनीय छैन यसलाई नै पूर्ण मान्नु हुँदैन, चित्त नबुझेको ठाउँमा संशोधान गर्नसक्ने प्रावधान खुल्ला हुँदाहुँदै पनि अहिलेको अवस्था आउनु कसैको हितमा छैन ।”

संविधानमा भएका राम्रा पक्षका बारेमा मधेसी जनतालाई बुझाउन नसक्दा अहिले विकराल अवस्था सिर्जना भएको परिषद्ले जनाएको छ ।

संविधानको गलत अर्थ लगाई तराई–मधेसका केही राजनीतिक दलको अगुवाइमा भइरहेको राजनीतिक आन्दोलनले उग्ररुप लिइरहेकाले यसलाई समयमै समाधान गर्नुपर्ने परिषद्को भनाइ छ ।

विज्ञप्तिमा भनिएको छ, “नेपालीलाई नै मोहोरा बनाएर गरिएको अघोषित नाकाबन्दीले नेपाली र भारतीय जनताबीच रहेको सौहार्द सम्बन्धलाई कटुतामा परिणत गरेको छ । वर्तमान समस्या समाधान वार्ताका माध्यमबाट गरिनुपर्छ ।”

तराई मधेसको आन्दोलनसँगै छिमेकी मुलुक भारतले चालेको कदमले नेपाली जनतामा आइपरेको विषम परिस्थितिलाई राजनीतिक पहलमार्फत कूटनीतिक तवरमा समाधान गर्न सकिने परिषद्को आशा छ । रासस

राष्ट्रिय स्वाधीनताका विषयमा कसैसँग नझुक्ने – गृहमन्त्री बस्नेत

इटहरी, १३ मङ्सिर । गृहमन्त्री शक्ति बस्नेतले राष्ट्रिय स्वाधीनता र अखण्डताका विषयमा नेपाल कसैसँग नझुक्ने बताउनु भएको छ ।

गृहमन्त्री बस्नेतले आज सुनसरी जिल्लाको इटहरीस्थित सशस्त्र प्रहरीको बराह बाहिनी मुख्यालय पकलीमा आयोजित क्षेत्रीय सुरक्षा गोष्ठीपछि स्थानीय सञ्चारर्मीसँगको कुराकानीमा सो कुरा बताउनुभएको हो ।

क्षेत्रीय सुरक्षासम्बन्धी गोष्ठीमा पूर्वी नेपालको तराईका सीमा क्षेत्रमा भइरहेका गतिविधिका विषयसम्बन्धी जिल्लाका सुरक्षा प्रमुखबाट ठोस प्रतिवेदन प्रस्तुत गरिएको र त्यस विषयमा गोष्ठीमा विस्तृत छलफल गरी ठोस निचोड निकालिएको पनि गृहमन्त्री बस्नेतले सञ्चारकर्मीलाई अवगत गराउनुभयो ।

मन्त्री बस्नेतले पछिल्लो समयमा भारतसँग सीमा जोडिएका क्षेत्रमा भएको गोलीकाण्ड, तस्करी, कालोबजारीलगायतका विषयमा पनि विस्तृत छलफल भएको थप जानकारी दिनुहुँदै उहाँले कालोबजारी गर्ने उद्योगी व्यापारी र सीमा क्षेत्रमा तस्करी गर्ने समूहको कडा निगरानी राखेर कडा कारबाही चलाइने ठोकुवासमेत गर्नुभयो ।

लामो समयदेखि राजमार्ग क्षेत्रमा देखिँदै आएको अवरोधलाई सरकारले खुलाउने विषयमा पनि विस्तृत छलफलसँगै कसरी राजमार्गलाई सहज तुल्याउने र कसरी सुरक्षाकर्मी परिचालित हुने भन्ने विषयमा पनि गोष्ठीले ठोस मार्गचित्र तयार पारेको पनि गृहमन्त्री बस्नेतले सञ्चारकर्मीलाई जानकारी दिनुभएको छ ।

तराईमा मधेस आन्दोलनका कारणले राजमार्गमा अवरोध भइरहेको, ठाउँठाउँमा सार्वजनिक सवारी साधनमा ढुङ्गामुडा गर्ने कार्य भइरहेको र अर्बांैको नोक्सानी गराउने कार्य भइरहेको तर्फ सरकार ज्यादै गम्भीर भएकाले राज्यले ठोस योजना बनाएर जोडदार रुपले काम गर्ने निचोड निकालेको पनि मन्त्री बस्नेतको भनाइ रहेको छ ।

सीमा क्षेत्रमा छिमेकी मुलुक भारततिरबाट भइरहेको अवरोध तथा संयुक्त मधेसी मोर्चाका तर्फबाट भइरहेको धर्ना र आन्दोलन आदिलाई सहज वार्ताका माध्यमबाट निकास दिनका लागि पनि सरकारले वार्ता जारी राखेको र चाँडै नै कूटनीतिक पहल गरेर त्यसको पनि ठोस निकास निकाल्ने विषयमा पनि विस्तृत छलफल भएको उहाँले बताउनुभयो ।

क्षेत्रीय सुरक्षा गोष्ठीमा पूर्वी तराईका जिल्लामा क्रियाशील सुरक्षा निकायका प्रमुखबाट वर्तमान अवस्थामा भइरहेका गतिविधि तथा नेपाल सरकारका तर्फबाट भइरहेको सुरक्षा तैनाथीका विषयमा पनि विस्तृत छलफल भएको पनि मन्त्री बस्नेतले बताउनुभयो ।

उहाँले भारतीय सीमा सुरक्षा बलका तर्फबाट नेपालमा प्रवेश गरेर गोली चलाएको तथा हातहतियारसहित नेपाली भूमिमा प्रवेश गरिरहेको घटनालाई पनि सरकारले कूटनीतिक प्रयासबाट अब उप्रान्त दोहोरिन नदिनका लागि भरमग्दुर प्रयास भइरहेको तथा यो विषयमा भारत सरकारसमक्ष पनि कुराकानी भइरहेको मन्त्री बस्नेतले उल्लेख गर्नुभयो ।

मन्त्री बस्नेतले शान्ति सुरक्षा जस्तो विषयलाई अति संवेदनशील विषयका रुपमा सरकारले हेरिरहेको र आजमात्र राजधानी काठमाडाँैमा प्रहरीको खोजीको सूचीमा रहेका दुई जनालाई पक्राउ गर्दा केही शक्ति प्रदर्शन भएको तथा गोलीसमेत चलेको पनि जानकारी दिनुभएको छ ।

सुरक्षा गोष्ठीमा गृहमन्त्रालयअन्तर्गतका सुरक्षा निकायका प्रमुख तथा क्षेत्रीय र जिल्ला तहका सुरक्षा निकायका प्रमुखको पनि सहभागिता रहेको थियो । बैठकमा नेपाली सेना, सशस्त्र प्रहरी, जनपद प्रहरी र राष्ट्रिय अनुसन्धान विभागका उच्च तहका कर्मचारीसमेतको सहभागिता रहेको थियो । रासस

टीकापुरमा विषालु च्याउ खाँदा सातजना बिरामी

धनगढी, १३ मङ्सिर । कैलाली जिल्लाको टीकापुर नगरपालिका–९ एकतानगरमा आज आफ्नै घर अगाडि उमे्रको विषालु च्याउ खाँदा सात जना बेहोस भएका छन् ।

जिल्ला प्रहरी कार्यालयले स्थानीय चन्द्र ग्रान्जामगर, बलराम ग्रान्जामगर, दिपेश ग्रान्जामगर, तुल्सी ग्रान्जामगर, नन्दकला नाथ, तारा नाथ र खगेशरा थापा घरअगाडि उमे्रको च्याउ खाँदा बिरामी भएको जनाइएको छ ।

बेहोस सबैलाई उपचारका लागि टीकापुर अस्पतालमा भर्ना गरिएको छ । उनीहरुको अवस्था खतरामुक्त रहेको जनाइएको छ । रासस

अधिकारप्राप्ति नहुँदासम्म आन्दोलन : मधेसवादी नेता

पथरी (मोरङ), १३ मङ्सिर । सङ्घीय गठबन्धनका नेताले मधेसको आन्दोलन हिमाल र पहाडका सबै भागमा पु¥याउने बताएका छन् ।

आज विराटनगरमा आयोजित जन प्रदर्शनलाई सम्बोधन गर्दै सङ्घीय गठबन्धनका नेताले मधेसको आन्दोलन जायज भएकाले आन्दोलनलाई हिमाल र पहाडका सबै भागमा पु¥याउने उनीहरुले बताएका हुन् ।

कार्यक्रमलाई सम्बोधन गर्दै सङ्घीय समाजवादी फोरम नेपालका अध्यक्ष उपेन्द्र यादवले अहिलेको मधेसको आन्दोलन अधिकारको आन्दोलन भएकाले आन्दोलनबाट कोही तर्किने अवस्था नरहेको उल्लेख गनुभयो । उहाँले सबै निकायमा समान अवसर सिर्जना गर्नु राज्यको दायित्व भएकाले मधेसी जनतालाई हेर्ने दृष्टि परिवर्तन अझै हुन नसकेको बताउनुभयो ।

सद्भावना पार्टीका अध्यक्ष राजेन्द्र महतोले संबिधानसभाबाट जारी भएको संविधानले मधेसीको अधिकार सुरक्षित गर्न नसकेकाले राज्यसत्ताको हरेक अङ्गमा मधेसीको आधा सहभागिता खोजेको बताउनुभयो । उहाँले तराईको आन्दोलनलाई मधेसी–पहाडीको आन्दोलनको रुपमा गलत प्रचार गरिएको आरोप पनि लगाउनुभएको छ ।

तराई मधेस लोकतान्त्रिक पार्टीका महामन्त्री सर्वेन्द्रनाथ शुक्लाले वार्ताको नाममा सरकारले आन्दोलनरत पक्षलाई थकाउन खोजेको टिप्पणी गर्नुभयो ।

कार्यक्रममा बोल्दै तराई मधेस सद्भावना पार्टीका अध्यक्ष महेन्द्र्र राय यादवले विभिन्न समयमा सरकारसँग भएका सम्झौता कार्यान्वयन नहुँदासम्म आन्दोलन नरोकिने बताउनुभयो ।

कार्यक्रम सङ्घीय गठबन्धन मोरङका संयोजक राजकुमार यादवको सभापतित्वमा सम्पन्न भएको थियो । रासस

रसुवागढी सडक तत्काल सुधार गर्न समितिको निर्देशन

काठमाडौँ, १३ मङ्सिर । व्यवस्थापिका–संसद्को विकास समितिले नेपाल र चीन जोड्ने रसुवागढी–केरुङ नाका सुधार गर्ने प्रक्रिया तत्काल सुरु गर्न सरकारलाई निर्देशन दिएको छ ।

केही दिन पहिले विकास समितिका सभापति रवीन्द्र अधिकारीसहितको टोलीले सो नाकाको स्थलगत अनुगमन गरेपछि तयार पारेको प्रतिवेदन सभामुख ओनसरी घर्तीलाई बुझाउँदै एक लेनमा मात्रै सञ्चालनमा रहेको रसुवागढीसम्मको सडकखण्डलाई तत्काल सुधार गरी दुई लेनको बनाउनुपर्नेमा जोड दिएको छ ।

मुलुकका विद्यमान समस्याको समाधान गर्न तथा मुलुकको समग्र विकास गर्न छिमेकी राष्ट्र चीनबाट इन्धनलगायतका अति आवश्यकीय सामानको आयात गर्ने महत्वपूर्ण नाकाको विकास गर्न सो नाकालाई तत्काल प्रभावकारी सुधार गर्नुपर्ने समितिको प्रतिवेदनमा उल्लेख छ ।

काठमाडौँ–ककनी–त्रिशूली–धुन्चे–स्यापु्रmवँेशी सडकखण्ड त्रिशूली जलविद्युत् आयोजना निर्माण गर्न भारत सरकारको सहयोगमा २०३० सालमा निर्माण भएको अवस्थालाई मध्यनजर गर्दै सो सडकखण्ड स्तरोन्नति गर्न अत्यावश्यक रहेको, सो सडकखण्ड पाँच वर्ष पहिले कालोपत्र भएको र पुल पनि साँघुरा रहेकाले तीनलाई पनि विस्तार गर्नुपर्ने देखिएको छ ।

समितिले निर्माण कार्यका लागि इन्धन तथा उपकरणको सहज आपूर्तिको व्यवस्था गर्नुपर्ने, मालपोत तथा नापीबाट हुनुपर्ने कित्ताकाटलगायतका कार्य गर्नुपर्ने, सडक निर्माण क्षेत्रमा पर्ने रुख काट्ने कार्यको व्यवस्थापन गर्नुपर्ने, निर्माण सामग्रीको सहज उपलब्धता र विष्फोटक पदार्थ उपलब्ध गराउनुपर्ने तथा सडक क्षेत्रमा गइरहने पहिरो नियन्त्रण गर्नुपर्ने सुझाव दिएको छ ।

सडकमा प्रभावकारी सञ्चार संयन्त्रको विकास गर्नुपर्ने, साँघुरो बाटोमा रहेका पहिरो तथा पहाड काट्नुपर्ने तथा सडक संरचना सुधार गर्नुपर्ने समितिको निष्कर्षमा उल्लेख छ । सडक सञ्जाल विकासको तत्कालीन, मध्यकालीन र दीर्घकालीन योजना नभएको होइन तर त्यसको प्रभावकारी कार्यान्वयन गर्नुमात्रै प्रमुख आवश्यकता रहेको भन्दै समितिले नाकाबन्दीले सङ्कटमा पारेको मुलुकलाई त्राण दिन पनि उत्तरतर्फका नाका तत्काल खोल्नुपर्ने र स्तरोन्नति गर्नुपर्नेमा सरकारको ध्यानाकर्षण गराएको छ ।

नेपालमा अहिलेमात्रै नाकाबन्दी भएको नभई विगतमा पनि भएको भन्ने तथ्यलाई आत्मसात् गर्दै विगतका गल्ती नदोहो¥याइकन अगाडि बढ्नु आजको प्रमुख कार्यभार भएको प्रतिवेदनमा जनाइएको छ ।

रसुवागढी–केरुङ नाकाबाट इन्धनलगायत अत्यावश्यकीय सामग्रीको आयात गर्न सकिने निष्कर्ष निकाल्दै विकास समितिले सो सडकखण्डका केही अप्ठ्यारा स्थानमा मर्मतसम्भार गरी सडकलाई चुस्त दुरुस्त बनाउन सकिनेमा जोड दिएको छ । समितिले मर्मतसम्भार कार्य तुरुन्त प्रारम्भ गरी इन्धनलगायतका अत्यावश्यक वस्तुको सहज आयात गर्न शीघ्र सडक सुधारगर्न र मुलुकलाई नाकाबन्दीको चङ्गुलबाट मुक्त पार्नुपर्नेमा जोड दिएको छ ।

समितिका सभापति अधिकारी, सदस्य कर्णबहादुर विक, जनार्दन ढकाल, रामकुमार भट्टराई, रामचन्द्र पोखरेल, सीता गिरी ओली, मध्यमाञ्चल क्षेत्रीय सडक निर्देशक किशोरनाथ गङ्गोल, डिभिजन सडक रसुवा–नुवाकोटका डिई रोहित विसुराललगायतको टोलीले केही दिन पहिले सो सडकखण्डको स्थलगत निरीक्षण गरेको थियो ।

समितिको प्रतिवेदन बुझ्दै सभामुख घर्तीले सो सडकखण्डका सम्बन्धमा समितिले औँल्याएका विषयलाई कार्यान्वयन गराउन सरकारलाई ध्यानाकर्षण गराउने विश्वास दिलाउनुभएको थियो । रासस

प्रम ओली र भारतीय राजदूत भेटवार्ता

काठमाडौँ, १३ मङ्सिर । प्रधानमन्त्री केपी शर्मा ओली र नेपालका लागि भारतीय राजदूत रणजीत रायबीच आज साँझ प्रधानमन्त्री निवास बालुवाटारमा भेटवार्ता भएको छ ।

भेटमा प्रधानमन्त्रीले भारतद्वारा गरिएको अघोषित नाकाबन्दीका कारण नेपालले असहज स्थिति भोग्नुपरेको भन्दै नाकाबन्दी फिर्ता लिन राजदूतको ध्यानाकर्षण गराउनुभएको थियो ।

प्रधानमन्त्रीका प्रेस सल्लाहकार प्रमोद दाहालले राजदूतसँग समसामयिक विषयमा छलफल भएको जानकारी दिँदै छलफल सकारात्मक भएको बताउनुभयो । रासस

मोहली पुलमुनि राखिएको सिलिन्डर बम निष्क्रिय

सप्तरी, १३ मङ्सिर । नेपाली सेनाको बम डिस्पोजल टोलीले पूर्व–पश्चिम राजमार्गअन्तर्गत सप्तरीको पोर्ताहा र बरमझियाको बीचमा पर्ने महुली पुल ध्वस्त पार्ने गरी अज्ञात समूहले राखेको दुईवटा सिलिन्डर बम आज निष्क्रिय पारेको छ ।

आज बिहान पुलमुनि शङ्कास्पद अवस्थामा राखिएको दुईवटा सिलिन्डर बम राजविराजस्थित कृष्ण दल गणबाट गएको नेपाली सेनाले निष्क्रिय पारेको हो । दुईवटा ग्यासको सिलिन्डरलाई बोरामा राखी मट्टीतेल र पेट्रोल छर्केर २५ मिटर डोरीमा आगो लगाई पुलमा क्षति गर्ने उद्देश्यले राखेको अवस्थामा बम फेला परेको थियो ।

सशस्त्र प्रहरी बल दन्तकालीन गण बरमझियादेखि ५०० मिटर दक्षिण राजमार्गमा पर्ने मोहली पुलमुनि सिलिन्डर बम फेला परेको थियो । रासस

बाबु नै र्निदयी भएपछि चार सन्तानले अकालमै जयान गुमाउनुप-यो

मुगु, १३ मङ्सिर । आमा बाबुको माया आप्mना बालबच्चामा कति हुन्छ त्यसको वर्णन नै गर्न सायद कसैले सक्दैन ।

आमा बुबाले बोलाएपछि बालबच्चाले आश मान्ने गर्दछन् त्यसमा पनि कोही बाबुले आफ्ना बालबच्चालाई फलफूल खान बोलाउँदा नजाने कुरै भएन । यो यस्तै आफ्ना बच्चालाई वनमा पाइने फल खान आऊ भनेर बोलाएको एक निर्दयी बाबुले फल खान आएका आफ्ना दुई छोरा र दुई छोरीलाई हत्या गरेको छ ।

गत ९ गते हयाङ्गलु–६ रिगा गाउँका नरबहादुर रोकायाले आफ्नी श्रीमती घाँस काटन गएको र आफू गाउँको भतेर खान गएको र साँझ घर आउँदा आफ्ना चार बालबालिका हराएको भनी प्रहरी चौकी सुकाढिकमा खबर गरे । यसपछि प्रहरीले चार दिनसम्म खोजतलास गर्दा पनि पत्ता लागेन ।

प्रहरी चौकी कालै, इलाका प्रहरी कार्यालय रातापानी र जिल्ला प्रहरी कार्यालय मुगुबाट गएको थप प्रहरी तथा स्थानीय गाउँलेले गाउँ वरपर खोजबिन गर्दा केही पत्तो नलागेपछि धामी झाँक्रीसम्मलाई हेराए । केही धामीले भूतप्रेतले लुकाएको हुन सक्नेसम्म अड्कलबाजी गरे तर घरमै राक्षस भएको कसैले अनुमान गरेनन् ।

आज बिहान रोकायाका छिमेकीकी छोरी कक्षा ४ अध्ययनरत नौ वर्षीया नबिनालाई प्रहरीले सोधेपछि घटनाबाहिर आयो । नबिनाले ९ गते बिहान ११ बजेतिर चार भाइबहिनी घरबाट निस्कँदै गर्दा कता जाने भनेर सोधेको र सुन्तलीले बुबाले खेतमा खरी नामक फल खान बोलाएको भनेको बताएपछि प्रहरीको शङ्का बाबुमाथि प¥यो र तत्कालै बाबु रोकायालाई नियन्त्रणमा लिई सोधपुछ गर्दा जिन्दगीबाट रिस उठेर आफ्ना बच्चाको हत्या गरी वंश नाश गरेको स्वीकारे ।

जिल्ला प्रहरी कार्यालयका निमित्त प्रहरी नायब उपरीक्षक लोकबहादुर जिसीका अनुसार रोकायाले आफ्नी नौ वर्षीया छोरी सुन्तली, छ वर्षीय छोरा युवराज, चार वर्षीया छोरी विपना र दुई वर्षीय छोरा दीप रोकायालाई खरी नामक फल खान बोलाई हत्या गरेर खेतमा खाडल खनेर चारै बच्चालाई राखी बाहिर ढुङ्गाको पर्खाल लगाएका थिए । हत्याराले बताएअनुसार गाउँबाट १०० मिटरको दूरीमा रहेको आफ्नै खेतमा बच्चाको लास फेला परेको थियो ।

प्रहरीले हत्यारा रोकायाले वंश नाश गर्ने भनेर चारै बच्चा मारेको बताए पनि आफ्नै बच्चा किन मारे भन्ने थप खुल्न आएको छैन । सधँै आँखा अगाडि बोलेको रमाएको देखिने यी बालबच्चाको आँखै अगाडि लास देख्दा पूरै गाउँ शोकाकूल भएको छ । उनीहरु भनिरहेका छन् निर्दयी, पापीलाई मृत्युदण्ड दिनुपर्छ । घटनास्थल जिल्ला सदरमुकाम गमगढीबाट पश्चिम उत्तरतर्फ तीन दिन पैदल यात्रामा पर्दछ । रासस

प्रधानमन्त्री ओलीद्वारा सोमबार संयुक्त वार्ताको आह्वान

काठमाडौँ, १३ मङ्सिर । प्रधानमन्त्री केपी शर्मा ओलीले सत्तारुढ दल, प्रमुख प्रतिपक्षी नेपाली काँग्रेस र तराई मधेसमा आन्दोलनरत दलबीच सोमबार संयुक्त वार्ताका लागि आह्वान गर्नुभएको छ ।

तराई मधेसमा विगत लामो समयदेखि देखापरेको असन्तुष्टिलाई सम्बोधन गर्नका लागि प्रधानमन्त्रीले सोमबार बिहान ११ बजे प्रधानमन्त्री निवास बालुवाटारमा संयुक्त वार्ताको आह्वान गर्नुभएको हो ।

समस्या समाधानका लागि सबै पक्षलाई सकारात्मक ढङ्गले प्रस्तुत हुन र मुलुकले भोग्नुपरेको समसयालाई वार्ता र संवादका माध्यमबाटै हल गर्ने ध्येयका साथ प्रधानमन्त्री ओलीले संयुक्त छलफलको आयोजना गर्नुभएको प्रधानमन्त्रीका प्रेस सल्लाहकार प्रमोद दाहालले जानकारी दिनुभयो ।

पछिल्ला दिनमा समस्या समाधानको विषयलाई लिएर प्रमुख दल र आन्दोलनरत दलबीच सार्थक वार्ता हुन नसकिरहेका बेला प्रधानमन्त्रीले भोलीका लागि आह्वान गर्नुभएको वार्तालाई सकारात्मक रुपमा हेरिएको छ ।

वार्तामा प्रधानमन्त्री ओलीले सरकारमा सहभागी प्रमुख दलका नेता, प्रमुख प्रतिपक्षी नेपाली काँग्रेस र तराई मधेसमा आन्दोलनरत दलका शीर्ष नेतालाई बोलाउनुभएको छ । वार्तालाई सकारात्मक बनाउने उद्देश्यका साथ एकीकृत नेकपा (माओवादी) का अध्यक्ष पुष्पकमल दाहालले पनि आवश्यक तयारी गर्नुभएको छ । सोही तयारीअनुसार नै शनिबार उहाँले प्रधानमन्त्री ओली र काँग्रेस सभापति सुशील कोइरालासँग छलफल गर्नुभएको थियो ।

राजधानीमा आज आयोजित एक कार्यक्रममासमेत अध्यक्ष दाहालले वार्ता र संवादमार्फत नै समस्याको समाधान गर्ने प्रयासमा आफू लागेको बताउनुभएको थियो । वार्तामार्फत समस्याको समाधान गर्ने उद्देश्यका साथ अध्यक्ष दाहालले आन्दोलनरत पक्षसँग निरन्तर अनौपचारिक संवाद गर्नुभएको छ । मधेसी मोर्चाले समानुपातिक समावेशी प्रतिनिधित्व, जनसङ्ख्याका आधारमा निर्वाचन क्षेत्रलगायतका ११ बुँदे माग अगाडि सारेको छ । यस्तै, सङ्घीय संरचनाको सीमाङ्कनमा पनि प्रष्ट धारणा आउनुपर्ने मोर्चाको माग छ ।

मोर्चाले उठाएका विषयमध्ये तत्काल पूरा गर्न सकिने मागलाई संविधान संशोधनका माध्यमबाट समाधान गर्ने र अन्य मागलाई उच्चस्तरीय राजनीतिक समिति तथा संसदीय समितिमार्फत अगाडि बढाउन सकिने प्रस्ताव एमाओवादी अध्यक्ष दाहालले राख्दै आउनुभएको छ ।

काँग्रेसले भने आफू नेतृत्वको सरकारले सदनमा प्रस्तुत गरेको संविधान संशोधनको प्रस्तावलाई पारित गरिए समस्या समाधानमा मार्गप्रशस्त हुने धारणा राख्दै आएको छ । सबै पक्षसँगको छलफलको आधारमा समस्या समाधानमा प्रतिबद्ध भएर लाग्ने र लचकताका साथ प्रस्तुत हुनुपर्ने दबाब सत्तारुढ दल र आन्दोलनरत मोर्चालाई पर्दै आएको छ ।

लामो समयदेखिको तराई मधेसको बन्द र भारतको अघोषित नाकाबन्दीका कारण मुलुकको जनजीवन प्रभावित भएकोमा सबै विषयलाई वार्ता र संवादका माध्यमबाट अगाडि बढाउनुपर्नेमा दलहरुको जोड रहेको छ । रासस

प्रवासी श्रमिकका समस्यालाई लिएर साउदीमा चिन्ता

साउदी अरब, १३ मङ्सिर । सरकारले वैदेशिक रोजगारीलाई सुरक्षित एवम् कामदारमैत्री बनाउन नसक्दा नेपाली कामदारले विभिन्न समस्या झेल्नुपरेको साउदी अरबमा आयोजित एक कार्यक्रमका सहभागीले बताएका छन् ।

वैदेशिक रोजगारीमा देखा परेका विकृति र विसङ्गतिप्रति राज्य गम्भीर नहँुदा प्रवासमा रहेका लाखाँैं नेपाली श्रमिकले दःुख भोग्नुपरेको भन्दै उनीहरुले चिन्ता व्यक्त गरेका हुन् । साउदी अरबसँग श्रम सम्झौता हुन नसक्दा नेपाली श्रमिक समस्यामा परेको भन्दै उनीहरुले नेपाली श्रम र सीपको उचित मूल्याङ्कनसहित श्रम सम्झौता हुनुपर्नेमा जोड दिएका छन् ।

साउदी अरबमा क्रियाशील डेढ दर्जनभन्दा बढी सङ्घ संस्थाको संयुक्त आयोजनामा शुक्रबार साउदीको दमाममा सम्पन्न भएको ‘प्रवासी श्रमिकका समस्या र समाधान’ विषयक अन्तक्र्रियामा बोल्ने वक्ताले सेवा सुविधालाई ध्यानमा राखेर जति सक्दो छिटो श्रम सम्झौता गर्नुपर्ने सुझाव दिए । साउदीमा कार्यरत अधिकांश नेपाली कामदारले अझै पनि सम्झौता अनुरुप न्यूनतम तलब, सेवा सुविधासमेत पाउन नसकेको गुनासो गरेका छन् । प्रवासी श्रमिकले भोग्नुपरेका समस्याका विषयमा राज्य गम्भीर नभएकै कारण नेपाली कामदारले दिनप्रतिदिन पीडा खेप्नु परेको उनीहरुको भनाइ छ ।

कमजोर सरकारी नीति र मेनपावर कम्पनीको लापरबाहीका कारण सम्झौता अनुसारको काम नपाउनु, तोकिएको अवधिभन्दा बढी काम गर्नुपर्ने, करार अवधि सकिए पनि स्वदेश फर्कन नपाउने, बिमा अवधिमा समस्या, मानसिक तथा शारीरिक यातना, काम गर्ने सिलसिलामा मृत्यु भएकाको शव पठाउन ढिलाइ हुनेलगायत समस्या साउदीमा व्याप्त रहेपनि समाधानका लागि सम्बन्धित निकायले ध्यान नदिएको उनीहरुको आरोप छ ।

नेपाली कामदारका लागि ठूलो श्रम बजारको रुपमा लिइएको साउदी अरबसँग श्रम सम्झौता भएको खण्डमा हाल देखापरेका सबै खाले जटिल समस्या समाधान हुने सहभागीले विश्वास व्यक्त गरे । श्रमिकको समस्याप्रति साउदीमा रहेको नेपाली दूतावासले चासो नदिएको भन्दै सहभागीहरुले दूतावासको कार्यशैलीप्रति कडा आलोचना गरेका थिए । आपतविपतमा परेका नेपालीको उद्धारमासमेत दूतावासले सक्रियता नदेखाएको गुनासो गर्दे उनीहरुले कार्यशैली सुधार गर्न सुझावसमेत दिए ।

सहभागीहरुले दूतावासमा टेलिफोन सम्र्पक गर्दा फोन नउठ्ने समस्या रहेको भन्दै सहज सम्र्पकको व्यवस्था मिलाउन आग्रह गरे । साउदीमा कार्यरत अधिकांश घरेलु महिला कामदार मानसिक एवम् शारीरिक यातनाबाट पीडित हुनुपरेको भन्दै घरेलु महिला कामदार पठाउने प्रक्रिया पूर्णरुपमा बन्द गनुपर्ने बताए । कार्यक्रममा उठेका जिज्ञासामाथि स्पष्ट पार्दै साउदीका लागि कार्यवाहक राजदूत आनन्दप्रसाद शर्माले नेपाली श्रमिकमा देखा परेका समस्या समाधान गर्न दूतावासले प्रयास गरिरहेको बताउनुभयो । उहाँले देशबीच श्रम सम्झौताका लागि आवश्यक पहल भइरहेको बताउनुभयो ।

“साउदी अरबको आफ्नै नीति नियम र ऐनका कारण कम्तीमा तीन महिना कानुनी प्रक्रिया पूरा गर्न लाग्ने भएकाले ज्यान गुमाएका नेपाली श्रमिकको शव पठाउन ढिलाइ हुनेगरेको छ” उहाँले भन्नुभयो । नेपाली कामदारका तलब, बीमालगायत अन्य सेवा सुविधा लागू गराउन दूतावास गम्भीर रहेको शर्माको भनाइ थियो । कुनै पनि समस्या दूतावाससम्म आएको खण्डमा समाधानका लागि आफू प्रतिबद्ध रहने उहांँले बताउनुभयो ।

श्रम सहचारी कृष्णप्रसाद दवाडीले साउदी अरबसँग श्रम सम्झौता नभएकै कारण नेपाली कामदारले समस्या झेल्दै आएको बताउनुभयो । कार्यक्रममा गैरआवासीय नेपाली सङ्घ अन्तर्राष्ट्रिय समन्वय समितिका सदस्य यास्मिन बेगम, समाजसेवी राजु शैयाद, प्रवासी नेपाली मञ्चका बालाराम गिरी, स्याङ्जा सहयोग समाजका मोहन बिएसके, जनप्रगतिशील मोर्चाका मीनराज नाथ, नेपाल टे«ड युनियन महासङ्घ जिफन्टका राज तामाङ, प्रवासी नेपाली सेवा समाजका मोहन अर्याल, नेपाल मगर सङ्घका रुद्र शारु, फेन्ड्स अफ नेपालका श्रीकृष्ण श्रेष्ठ, रोशन श्रेष्ठ, अनुप नेपालीलगायतले प्रवासी श्रमिकका समस्या समाधानको एक मात्र विकल्प श्रम सम्झौता भएकाले जति सक्दो छिटो श्रम सम्झौता गर्नुपर्नेमा जोड दिनुभएको थियो ।

सो अवसरमा कावा राजदूत शर्मालाई नेपाली श्रमिकका समस्या र बीमामा देखिएको समस्याप्रति ध्यानाकर्षण गराउँदै कार्यक्रम संयोजक मोहन बिएसकेले ज्ञापनपत्र बुझाउनुभएको थियो । रासस

च्याउ खेतीमा सरकारको ध्यान पुगेन

काठमाडौँ, १३ मङ्सिर । च्याउ वैज्ञानिक डा महेश अधिकारीले नेपालमा च्याउको अनुसन्धान, अध्ययन र विकासका लागि सरकारी स्तरबाट पहल नभएको बताउनुभएको छ ।

बलम्बु च्याउ सहकारी संस्थाको सातौँ साधारणसभामा शनिबार उहाँले भूकम्पका कारण नेपालमा च्याउ उत्पादनस्थल नष्ट भएको र त्यसको लेखाजोखा नभएको भन्दै सरकारबाट च्याउ खेतीको गुणस्तरीय परीक्षण नभएकामा चिन्ता व्यक्त गर्नुभयो । नेपालमा पाइने च्याउको विकास र विस्तारका लागि सरकारी निकायले कुनै पहल नगर्नु दुःखद भएको भन्दै उहाँले अध्ययन र अनुसन्धानमा मात्र सीमित नभई खेतीका लागि किसानलाई ठोस कार्यक्रम गरी जानकारी गराउनुपर्नेमा जोड दिनुभयो ।

राष्ट्रिय सहकारी संघका वरिष्ठ उपाध्यक्ष मीनराज कँडेलले सङ्ख्यामा मात्र सहकारीको स्थापना नगरी त्यसको गुणात्मकता वृद्धि गर्नुपर्ने बताउनुभयो । गुणात्मकता वृद्धि गर्न धेरै भएका सहकारीलाई एकआपसमा गाभी काम गर्ने सकिने बताउँदै उहाँले त्यसका लागि पहल गर्ने बताउनुभयो । सहकारीले सातौँ साधारणसभाको अवसर पारी च्याउ खेतीका विषयमा अध्ययन, अनुसन्धान गर्नुहुने डा अधिकारीलाई सम्मान गरेको छ ।

त्यसैगरी संस्थाका शान्ती महर्जन र रिता श्रेष्ठलाई असल बचतकर्ता, रामकृष्ण र सानुमाया सार्कीलाई असल ऋणी र पुरुषोत्तम महर्जनलाई असल सेयरकर्ताको रुपमा सम्मान गरेको छ । यस्तै आठ जना च्याउ कृषकलाई च्याउमा पानी हाल्न प्रयोग गरिने ‘वाटर स्प्रे’पनि वितरण गरेको छ ।

संस्थाले आव २०७१÷७२ मा रु ३५ करोड २८लाख ५०हजार २६६ बचत सङ्कलन गरेको प्रतिवेदन प्रस्तुत गर्दै संस्थाका कोषाध्यक्ष बुद्ध श्रेष्ठले विविध विधामा रु १२ करोड ५५ लाख नौ हजार २०८ को कारोबार गरेको बताउनुभयो । ९२० जना सेयर सदस्य रहेको संस्थाले आगामी आवमा सो सङ्ख्या बढाएर ११ हजार सात पु¥याउने लक्ष्य राखेको संस्थाका अध्यक्ष धमेन्द्र महर्जनले जानकारी दिनुुभयो । रासस

सिलिन्डर बम फेला

सप्तरी, १३ मङ्सिर । पूर्वपश्चिम राजमार्गअन्र्तगत पोर्ताहा र बरमझियाका बीचमा पर्ने मोहली पुलमुनि अज्ञात समूहले राखेको दुई शक्तिशाली सिलिन्डर बम आज बिहान फेला परेको छ ।

राजमार्गमै पर्ने सो पक्की पुल ध्वस्त पार्ने उद्देश्यले राखिएको सो बमलाई निष्क्रिय पार्न राजविराजस्थित कृष्ण दलगढबाट नेपाली सेनाको बम निष्क्रिय टोली घटनास्थल पठाइएको जिल्ला प्रहरी कर्यालयका प्रहरी नायब उपरीक्षक नारायण चिमरियाले जानकारी दिनुभयो ।

घटनास्थलदेखि ५०० मि नजिकमा सशस्त्र प्रहरी बल दन्तकाली गण रहेको छ । अहिले राजमार्गमा चल्ने यातायात र सर्वसाधारणलाई रोक लगाइएको छ । ग्यासका दुई सिलिन्डरलाई बोरामा राखी मट्टितेल छर्केर २५ मि डोरीमा आगो लगाई पुल भत्काउने उद्देश्यले राखिएको प्रहरीले जनाएको छ । सिलिन्डर बम कसले राखेको भन्ने बारेमा अहिलेसम्म केही खुल्न सकेको छैन । रासस

मधेसका दुई प्रदेशको सीमा जोडिएको दुई प्रदेश माग

वीरगन्ज, १३ मङ्सिर । सङ्घीय समावेशी मधेसी गठबन्धनले संविधानमा अधिकतम संशोधनका माध्यमबाट मधेस आन्दोलनको मागलाई पूरा गरी विद्यमान समस्याको राजनीतिक निकास खोज्न सरकार तथा प्रमुख राजनीतिक दललाई ध्यानाकर्षण गराएको छ ।

यसका लागि गठबन्धनले नौसूत्रीय संशोधन प्रस्ताव अगाडि सारेको छ । गठबन्धनद्वारा आज यहा“ आयोजित पत्रकार सम्मेलनमा राज्यको पुनःसंरचना गर्दा मधेसको भूभाग (भित्री मधेससमेत) समाविष्ट गरी परस्परमा दुवै प्रदेशको सीमा जोडिएको दुई प्रदेशको निर्माण गर्नुपर्ने माग राखिएको छ ।

नारायणी नदीदेखि पूर्व झापासम्मका मधेसका भूभाग सम्मिलित पूर्वी मधेस प्रदेश र नारायणी नदी पश्चिम कञ्चनपुरसम्म पश्चिमी थरुहट मधेस प्रदेशको निर्माण गर्नुपर्ने, संसद्का लागि हुने प्रत्यक्ष निर्वाचन पद्धति अनुसार संविधानमा पूरै देशका लागि छुट्याइएको एक सय ६५ निर्वाचन क्षेत्र हरेक प्रदेशमा भएको जनसङ्ख्याको समानुपातिक दरले प्रदेशमा बा“डिनुपर्ने, उपल्लो सदनमा प्रत्येक प्रदेशबाट न्यूनतम एक सदस्य रहने गरी बा“की सदस्यको जनसङ्ख्याको अनुपातमा प्रतिनिधित्वको व्यवस्था हुनुपर्ने तथा तल्लो सदनका लागि छुट्याइएको समानुपातिकतर्फको ११० सङ्ख्यालाई प्रत्येक प्रदेशको जनसङ्ख्याका अनुपातमा बा“डफा“टको व्यवस्था हुनुपर्ने ध्यानाकर्षण पत्रमा उल्लेख गरिएको छ ।

ध्यानाकर्षणपत्रमा अबको २० वर्षसम्म निर्वाचन क्षेत्रमा हेरफेर नगरिने प्रावधानलाई खारेज गरी प्रत्येक १० वर्षमा हुने जनगणनाको आधारमा निर्वाचन क्षेत्रको समायोजन हुनुपर्ने, संसद्मा महिलाको ३३ प्रतिशत स्थान सुनिश्चित गर्नका लागि प्रत्यक्षतर्फ महिलाका लागि आरक्षित स्थानको व्यवस्था गर्नुपर्ने, राज्यका हरेक निकायमा राजनीतिक नियुक्तिमा पूर्ण रुपले समानुपातिक समावेशीकरणको सिद्धान्त अनुरुप नियुक्ति प्रक्रिया अवलम्बन गर्नुपर्ने तथा नागरिकताको प्रावधान अन्तर्गत महिलाले वैवाहिक सम्बन्धका आधारमा पाउने नागरिकता नेपालको अन्तरिम संविधान २०६३ मा भएको व्यवस्था अनुरुप हुनुपर्ने उल्लेख गरिएको छ ।

यसैगरी सर्वोच्च अदालत, प्रादेशिक उच्च अदालत र स्थानीय अदालत गरी तीन तहको न्यायालय हुने गरी प्रावधान राख्नुपर्ने, न्यायपरिषद्को गठन समावेशी प्रकारको हुनुपर्ने, सर्वोच्च अदालतका न्यायाधीशको कुल सङ्ख्याको पदपूर्ति गर्दा प्रादेशिक प्रतिनिधित्व र सामुदायिक प्रतिनिधित्व समेतलाई ध्यान दिइनुपर्ने तथा पूर्णकालीन र स्थायी प्रकृतिको संवैधानिक अदालतको व्यवस्था पनि संशेधनमार्फत गर्नुपर्ने आदि माग राखिएको छ ।

गठबन्धनमा राष्ट्रिय मधेस समाजवादी पार्टी, तराई–मधेस राष्ट्रिय अभियान, मधेसी जनअधिकार फोरम नेपाल (गणतान्त्रिक) र नेपाल सद्भावना पार्टी छन् । ती पार्टीका अध्यक्षले ध्यानाकर्षण पत्रमा हस्ताक्षर गर्नुभएको छ ।
पत्रकार सम्मेलनमा रामसपाका अध्यक्ष शरत्सिंह भण्डारीले सरकारले मधेसलाई उपेक्षा र पहाडलाई पक्षपोषण गरिरहेको आरोप लगाउनुभयो ।

अभियानका संयोजक जयप्रकाश गुप्ताले अबको हाम्रो लक्ष्य भनेको नै मधेस आन्दोलनका जायज र उपयुक्त मागलाई वार्ता र संवादबाट सामाधान गरी सङ्घीयतासहितको संविधान मार्फत समृद्ध र सम्मुन्नत नेपालको निर्माण गर्नु नै हो भन्नुभयो ।

फोरम (गणतान्त्रिक)का अध्यक्ष राजकिशोर यादव र नेपाल सद्भावना पार्टीका अध्यक्ष अनिलकुमार झाले गठबन्धन निर्माणको आवश्यकता, औचित्य र अहिलेको राजनीतिक अवस्थाको निकासका लागि राज्यको भूमिकालगायत विषयमा प्रकाश पार्नुभएको थियो ।
रासस
––––

दुर्घटनामा परेको बसबाट इन्धन बरामद

लहान, १३ मङ्सिर । सिरहाको पूर्वपश्चिम सडक अन्तर्गत कर्जनहा गाविसको बगाहामा आज बिहान दुर्घटनामा परेको बसबाट ठूलो परिमाणमा इन्धन बरामद भएको छ ।

झापाको बिर्तामोडबाट प्रहरीको सुरक्षा घेरामा काठमाडौँ जाँदै गरेको ना ४ ख ३७८८ नंको बस बिहान करिब ३ः०० बजेतिर बगहामा दुर्घटनामा परेपछि करिब १२ हजार लि पेट्रोल र डिजल बरामद भएको इलाका प्रहरी कार्यालय मिर्चैयाका प्रहरी नायब उपरीक्षक श्याम चौधरीले जानकारी दिनुभयो ।

चौधरीका अनुसार उक्त बस पश्चिमबाट पूर्व आउँदै गरेको ना ५ख ६५९४ नंको बससँग ठोक्किँदा केही यात्रु सामान्य घाइते भएका थिए । ठोक्किएको बसलाई प्रहरी निगरानीमा राखेर बिहान खानतलासी गर्दा काठमाडौँ लैजान ग्यालेनमा राखिएको पेट्रोल र डिजल बरामद गरिएको प्रहरी नायब उपरीक्षक चौधरीले उल्लेख गर्नुभयो । प्रहरीले इन्धन र बसका चालकलाई नियन्त्रणमा लिएर अनुसन्धान गरिरहेको छ ।

तराई–मधेसमा जारी आन्दोलनका कारणले इन्धन आपूर्ति असहज हुँदा प्रहरीको सुरक्षा घेरामा राजधानीसहित अन्य ठाउँमा जाने सवारी साधनका सञ्चालकले सुरक्षाको जोखिम भए पनि पेट्रोल र डिजललगायत इन्धन ओसारपोसार गरिरहेको गुनासो रहेको छ । रासस

ट्रकमा आगजनी

धादिङ, १३ मङ्सिर । बन्द अवज्ञा गरेको भन्दै नेकपा माओवादीका कार्यकर्ताले आज बिहान कालु पाँडे राजमार्ग (मलेखु–धादिङबेँसी खण्ड) मा पर्ने नलाङ गाविस–६ स्थित सिक्रे खोला नजिक एक ट्रकमा आगजनी गरेका छन् ।
चितवनबाट इँटा बोकेर धादिङबेंसी आउँदै गरेको ना४ख ७१३० नंको ट्रकमा तीन जनाको समूहमा आएका उनीहरुले पेट्रोल छर्की आगजनी गरेको र पूर्ण रुपमा जलेको जिल्ला प्रहरी कार्यालयका प्रहरी निरीक्षक वासुदेव थापाले जानकारी दिनुभयो । रासस

जापानी भाषा इन्ष्टिच्युट स्थापनाको स्वर्ण महोत्सव

काठमाडाँै, १३ मङ्सिर । नेपालको सबभन्दा पुरानो जापानी भाषा स्कुल काठमाडाँै जापानी भाषा इन्ष्टिच्युट स्थापनाको स्वर्ण महोत्सव आज यहाँ मनाइएको छ ।

तत्कालीन जापानी भाषाका अग्रज गुरुगुरुमा रामकृष्ण बर्मा र प्रेमलता तुलाधरको पहलमा २०२२ सालमा सो इन्ष्टिच्युट स्थापना भएको हो । इन्स्टिच्युटको भवनका इसिगाकी तेरुसीले योगदान दिए ।

इन्स्टिच्युटको स्थापनाको स्वर्ण महोत्सवका आयोेजित कार्यक्रममा सो इन्स्टिच्युटको स्थापनामा विशेष योगदान गर्ने बर्मा, तुलाधर र तेरुसीलाई मरणोपरान्त अभिनन्दनपत्र वितरण गरिएको थियो । ती अभिनन्दनपत्र उहाँहरुका परिवारका सदस्यले ग्रहण गरेका थिए ।

यसैगरी सो भाषा स्कुलमा १५ वर्षभन्दा बढी सेवा गरेका शिक्षक तथा कर्मचारीलाई प्रशंसापत्र प्रदान गरियो । प्रशंसापत्र पाउनेमा संस्थाका अध्यक्ष अमल रिमाल, प्रिन्सिपल निर्मणिलाल श्रेष्ठ, उपप्रधानाध्यापक सुजनप्रताप विवश, शिक्षक कमलध्वज जोशी, उषा राणा, नुर्बु लामा, मोती महर्जन, चन्द्र महर्जन, सुजनबहादुर श्रेष्ठ, सुशील श्रेष्ठ र प्रचण्डमान श्रेष्ठ तथा कर्मचारी ध्रुवराज श्रेष्ठ छन् ।

कार्यक्रममा मन्त्री पोखरेलले जापान नेपालको मित्र र प्रमुख दाता रहेको उल्लेख गर्दै नेपाल र जापानबीचको सम्बन्धलाई सुदृढ पार्न नेपालमा रहेका जापानी भाषाका स्कुलको योगदान रहेको बताउनुभयो । जापानी राजदूतावासका प्रथम सचिव कियोहिको हामादाले नेपाल र जापानबीचको दौत्य सम्वन्ध कायम भएको ६० वर्षका अवसरमा आगामी वर्ष (सन् २०१६ मा) नेपालमा रहेका जापानी भाषा स्कुल तथा जापानी सङ्घसंस्थामार्फत विभिन्न कार्यक्रम आयोजना गरिने जानकारी दिनुभयो ।

इन्ष्टिच्युटका प्रिन्सिपल निर्मणिलालले स्कुलको प्रतिवेदन प्रस्तुत गर्नुभएको थियो । सो अवसरमा नेपाली र जापानी कलाकारले साङ्गीतिक कार्यक्रम प्रस्तुत गरेका थिए । रासस

भारतीय जिप तोडफोड, पाँच पक्राउ

भीमदत्तनगर, १३ मङ्सिर । नेकपा माओवादीले आज बिहान कञ्चनपुरको भीमदत्तनगर बजारमा भारतीय नंको जिप तोडफोड गरेको छ ।

जिल्ला प्रहरी कार्यालयका अनुसार चम्मन चोकबाट गड्डाचौकीतर्फ गइरहेको एचआर २६ जेड ०२२७ नंको भारतीय जिप माओवादीका कार्यकर्ताले यहाँस्थित विद्युत् कार्यालय नजिक तोडफोड गरेका हुन् । प्रहरीले जिप तोडफोड र यातायातमा अवरोध पु¥याउँदै हिँडेका माओवादीका महाकाली इन्चार्ज देवीदत्त पाण्डेयसहित पाँच जनालाई नियन्त्रणमा लिइएको जनाएको छ ।

प्रहरीलाई तोडफोड गरिएको जिपलाई सुरक्षा दिई नेपाल भारत सीमा क्षेत्र गड्डाचौकी पार गराएको छ ।

असुरक्षाको कारण देखाउँदै प्रहरीले कञ्चनपुरमा गुडिरहेका भारतीय सवारी साधनको सुरक्षामा विशेष चासो देखाएको छ । प्रहरीले बिहानैदेखि सुरक्षा सक्रियता बढाएको छ ।

सशस्त्र प्रहरी सीमा सुरक्षा कार्यालय कञ्चनपुरका प्रमुख सशस्त्र प्रहरी उपरीक्षक तारादत्त पन्तका अनुसार पश्चिमी नाका गड्डाचौकीबाट नेपाल आउने भारतीय सवारी साधनलाई भारतीय सीमा सुरक्षा बल एसएसबीले बनबासा क्षेत्रमै रोकेको छ ।

माओवादीले भारतीय सवारी साधनलाई निसाना बनाउँदै तोडफोड गर्न थालेपछि एसएसबीले भारतीय सवारी साधनलाई सिमानामै नेपाल आउन रोकेको बताइएको छ । रासस

सुनकोसी–मरिन–वाग्मती डाइभर्सनको काम अघि बढ्दै

बर्दिवास, १३ मङ्सिर । सिंचाइमन्त्री उमेशकुमार यादवले विद्यमान राजनीतिक समस्याको निकासका लागि लोकतान्त्रिक शक्तिबीच सहकार्यमा जोड दिनुभएको छ ।

महोत्तरी, धनुषा र सिन्धुली जिल्लाका सिंचाइ आयोजनाको स्थलगत अवलोकन र नयाँ सम्भावनाबारे अध्ययन गर्ने सिलसिलामा बर्दिवास आइपुग्नुभएका मन्त्री यादवले आज सञ्चारकर्मीसँगको भेटघाटमा संविधान लेखन र घोषणासम्मको यात्रासँगै गरेका दलको एकताले मात्र राजनीतिक गतिरोधलाई संवैधानिक रुपमा निकास दिन सकिने बताउनुभयो ।
उहाँले सर्वसाधारण मान्छेलाई पेट्रोल छरेर आगो लगाउने, एम्बुलेन्स जलाउने, औषधि बोकेका गाडी तोडफोड गर्ने, पुल भाँच्ने, सुरक्षाकर्मीलाई घुँयत्रो र ढुङ्गा हान्नेजस्ता आन्दोललाई शान्तिपूर्ण भन्न सकिँदैन भन्नुभयो ।
‘‘मधेस मुद्दा सम्बोधनका लागि सम्विधान संशोधन आवश्यक छ’’ मन्त्री यादवले भन्नुभयो–, ‘‘यसका लागि संसद्मा आवश्यक सङ्ख्याको अनुमोदन प्रक्रियाका लागि काँग्रेसको सहमतिबेगर सम्भव छैन ।’’

मुलुकमा आर्थिक क्रान्तिका लागि सिंचाइ आयोजनाको सफल कार्यान्वयन आवश्यक रहेकाले आपूmले त्यसतर्फ पहल बढाएको उहाँको भनाइ छ । यसका लागि महोत्तरी, सर्लाही र धनुषालाई लक्ष्य गरी सुनकोसी–मरिन–वाग्मती डाइभर्सनको कामलाई अघि बढाइएको बताउँदै मन्त्री यादवले आयोजनाको बोलपत्र आव २०७३÷०७४ मा हुने जानकारी दिनुभयो ।

त्यसैगरी सुनकोसी–कमला डाइभर्सनबारे भारतसँग निर्णायक तहमा कुरा पु¥याइएको उहाँको भनाइ छ ।
पछिल्ला दिनमा कृषि उत्पादन बढाउन र आत्मनिर्भर बन्न कृषि र सिँचाइ मन्त्रालयबीच समन्वय आवश्यक रहेको बताउँदै उहाँले सरकारले कृषि सहकारीलाई बढावा दिन ‘सिंचाइमा सहकारी, घर घरमा भकारी’ नारालाई मूलमन्त्र बनाएर काम थालेको जानकारी दिनुभयो । रासस

भगौडा प्रहरीमाथि गोली

काठमाडौँ, १३ मङ्सिर । स्थानीय सुन्धारामा खटिएको प्रहरी टोलीले आज बिहान सुन्धारा नजिकै भगौडा प्रहरी छोटेलाल ठाकुरमाथि गोली प्रहार गरेको छ ।
अपराध महाशाखाबाट खटिएको टोलीले सुन्धाराको एक गेस्ट हाउसमा बसेका बारा जिल्लाका ठाकुरलाई चिनियाँ पेस्तोल बोकेको अवस्थामा गोली प्रहार गरिएको प्रहरी नायब उपरीक्षक किरणजङ्ग थापाले राससलाई जानकारी दिनुभयो । तराईका जिल्लामा आपराधिक क्रियाकलापमा संलग्न भएकाले पहिलेदेखि नै निगरानीमा रहेका ठाकुरसँगै बाराकै राजकुमार पटेललाई समेत शङ्का गरी पक्राउ गरिएको छ ।
सूचनाका आधारमा गेस्ट हाउसमा पुगेर ठाकुरलाई नियन्त्रणमा लिन खोज्दा मुठभेड भए पनि गोली चलाइएको र ठाकुरको घुँडामुनि गोली लागेको प्रहरी नायब उपरीक्षक थापाको भनाइ छ । घाइते ठाकुरलाई उपचारका लागि प्रहरी अस्पताल महाराजगन्ज लगिएको छ । रासस

ट्रकको ठक्करबाट मोटरसाइकल चालकको मृत्यु

काठमाडौँ, १३ मङ्सिर । आज बिहान ट्रकले ठक्कर दिँदा मोटरसाइकल चालकको मृत्यु भएको छ ।

बिहान ३ः१५ बजे थानकोटबाट कलङ्कीतर्फ आइरहेको युके००सिए ४७२४ नम्बरको भारतीय तरकारी बोकेको ट्रकको ब्रेक फेल भई काजी चन्द्रागिरी नपा– २३ ढुङ्गेअड्डा नजिकै बा६१प १३७८ नंको मोटरसाइकललाई ठक्कर दिँदा मोटरसाइकल चालकको उपचारका क्रममा मृत्यु भएको महानगरीय प्रहरी परिचालक कार्यालय रानीपोखरीले जनाएको छ ।

प्रहरी जवान लोकेन्द्रबहादुर चन्दका अनुसार मृतक अन्दाजी ४५÷४६ वर्षका भए पनि परिचय खुल्न सकेको छैन । रासस

हङकङ समाजले एम्बुलेन्स दियो

चितवन, १३ मङ्सिर । हङकङमा रहेका चितवनवासीको संस्था ‘चितवन–हङकङ समाज’ले माडीको कल्याणपुरमा एम्बुलेन्स सहयोग गरेको छ । समाजले शनिबार एक कार्यक्रमको आयोजना गरी नेपाल रेडक्रस सोसाइटी उपशाखा कल्याणपुरलाई एम्बुलेन्स हस्तान्तरण गरेको हो ।

चितवन हङकङ सम्पर्क समाजका अध्यक्ष टेकप्रसाद गुरुङले उपशाखा कल्याणपुरका कार्यबाहक सभापति सुरेशबहादुर थापालाई एम्बुलेन्सको साँचो हस्तान्तरण गर्नुभयो ।

सो अवसरमा अध्यक्ष गुरुङले गरिब, असहाय बिरामीलाई ल्याउनु पर्दा आर्थिक अभाव भएमा समाजले ती बिरामीको एम्बुलेन्स खर्च व्यहोरिदिने बताउनुभयो ।

माडीको कल्याणपुर भरतपुर सदरमुकामबाट ४७ किलोमिटरको दूरीमा रहेको छ । जहाँ पुग्न चितवन राष्ट्रिय निकुञ्जको घना जङ्गल र खोला तर्नुपर्ने हुन्छ । उपचारका लागि भरतपुरसम्म आउने साधनको अभावमा धेरैको ज्यान जाने गरेको थियो ।

स्थानीयवासीले एम्बुलेन्स पाएसँगै खुसी प्रकट गरेका छन् । योसँगै माडी क्षेत्रमा एम्बुलेन्सको सङ्ख्या तीन पुगेको छ । रासस

हतियारसहित नेपाल प्रवेश गरेका भारतीय सुरक्षाकर्मी नियन्त्रणमा

काँकडभिट्टा (झापा), १३ मङ्सिर । झापाको दक्षिणी सीमावर्ती गाविस केचनामा दशगजा छिचोलेर नेपाली बस्तीमा हतियारसहित प्रवेश गरेका १३ जना भारतीय सुरक्षाकर्मीलाई आज बिहान सशस्त्र प्रहरीले नियन्त्रणमा लिएको छ ।

भारतीय सीमा सुरक्षा बल (एसएसबी)का ती हतियारधारी सुरक्षाकर्मीको समूह सुपारी तस्करीमा संलग्न समूहलाई पछ्याउँदै नेपाली बस्तीमा पसेको प्रत्यक्षदर्शी स्थानीय गाउँलेले बताएका छन् । उनीहरुसँग चार थान आधुनिक हतियार साथमा रहेको बताइएको छ ।
झापाका प्रजिअ तेजप्रसाद पौडेलले आज बिहान नेपाली बस्तीमा भारतीय सुरक्षाकर्मी पसेको जानकारी गाउँलेले दिएपछि सशस्त्र प्रहरीको सीमा सुरक्षा टोली घटनास्थलमा पुगेर उनीहरूलाई नियन्त्रणमा लिएको बताउनुभयो ।

भारतीय सुरक्षाकर्मीलाई केचना–४ बाट सशस्त्र प्रहरीले नियन्त्रणमा लिएको सशस्त्र प्रहरी नायब उपरीक्षक प्रेमबहादुर भण्डारीले जानकारी दिनु भयो ।

प्रजिअ पौडेलले सदरमुकाम चन्द्रगढीबाट घटनाको स्थलगत विवरण लिन सहायक प्रजिअ डम्बरुप्रसाद निरौलालाई केचना पठाइएको बताउनुभएको छ ।

हाल भारतीय सुरक्षाकर्मीलाई केचनास्थित सशस्त्र सीमा सुरक्षा बलको क्याम्पमा राखिएको छ । रासस

दुर्घटनामा एकको मृत्यु ,बालक घाइते

सुन्दरदुलारी (मोरङ), १३ मङ्सिर । मोरङको बेलबारी– ६ बेतना चोकमा गएराति सवारी दुर्घटना हुँदा एकजनाको मृत्यु भएको छ ।

मृत्यु हुनेमा ट्र्याक्टर चालक मोरङको बयरवन– ७ का २७ वर्षीय मोहन तिम्सिना रहेका छन् ।

सोही ट्र्याक्टरमा सवार बयरवन– ७ कै १० वर्षीय बालक समीर चौधरी गम्भीर घाइते भएका छन् ।

पूर्वपश्चिम राजमार्गमा पश्चिम गइरहेको को२त ५१५७ नंको हाते ट्र्याक्टरले सडकको किनारामा रोकेर राखेको को२१प ७७७२ नंको मोटरसाइकललाई ठक्कर दिँदा ट्र्याक्टर अनियन्त्रित भई विपरीत दिशातर्फबाट आउँदै गरेको ना३ख ९०७० नंको बसमा ठक्कर खाएको थियो ।

तिम्सिनाको उपचारका लागि अस्पताल लाँदै गर्दा बाटैमा मृत्यु भएको थियो । घाइते चौधरीको धरानस्थित विपी कोइराला स्वास्थ्य विज्ञान प्रतिष्ठानमा उपचार भइरहेको प्रहरीले जनाएको छ ।

दुर्घटनामा संलग्न सवारी साधन र बस चालक इलाका प्रहरी कार्यालय बेलबारीको नियन्त्रणमा रहेको प्रहरीले जनाएको छ । रासस

कास्कीमा बन्द गर्दै हिँडेका २७ जना प्रहरी नियन्त्रणमा

पोखरा, १३ मङ्सिर । नाकाबन्दीका विरुद्धमा नेपाल कम्युनिस्ट पार्टी माओवादी(चन्द समुह)ले आह्वान गरेको नेपाल बन्दका कारण कास्कीको जनजीवन प्रभावित भएको छ ।

बन्दका कारण यहाँ बिहानैदेखि सार्वजनिक सवारी साधन चलेका छैनन् भने बजार क्षेत्रमा पसल फाट्टफुट्ट खुलेका छन् ।

बिहानको समयमा सञ्चालन हुने शैक्षिक संस्थाको पठनपाठन पनि प्रभावित भएको छ ।

बिहान कास्कीका विभिन्न ठाउँमा बन्द गराउँदै हिँड्ने २७ जनालाई लेखनाथ र पोखराका विभिन्न ठाउँबाट प्रहरीले नियन्त्रणमा लिएको कास्की प्रहरीका प्रवक्ता कृष्णबहादुर बल्लीले बताउनुभयो ।

उहाँका अनुसार लेखनाथ नगरपालिका क्षेत्रबाट सातजना र पोखरा उपमहानगर क्षेत्रबाट २० जनालाई प्रहरीले नियन्त्रणमा लिएको हो । रासस

बन्द गर्न खोज्ने तीन पक्राउ

चितवन, १३ मङ्सिर । नेकपा माओवादी नेत्रविक्रम चन्द समुहले आह्वान गरेको नेपाल बन्दका क्रममा आज बिहान नारायणगढबाट तीनजनालाई प्रहरीले पक्राउ गरेको छ ।

गाडीमा ढुङ्गा हान्न खोज्दा तिनीहरुलाई पक्राउ गरिएको प्रहरीले जनाएको छ । प्रहरी उपरीक्षक वसन्तबहादुर कुँवरका अनुसार माइक्रोबसको साँचो खोस्ने र ढुङ्गा हान्ने प्रयास गर्दागर्दै ढुङ्गासहित उनीहरुलाई पक्राउ गरिएको हो ।

पक्राउ पर्नेहरुमा पार्टीको क्षेत्र नं ३ का सेक्रेटरी भीमबहादुर खड्का र विद्यार्थीहरु नयनसिंह खड्का र केशव भट्टराई रहेका छन् ।

माओवादीका जिल्ला सेक्रेटरी महेश थारुले भारतीय गाडी लक्षित गरिएको भए पनि नेपाली सवारी साधन भने तोडफोड नगरी रोक्ने काममात्रै भइरहेको बताउनुभयो । बन्दका कारण जनजीवन प्रभावित भएको छ । रासस

लैङ्गिक हिंसाविरुद्ध सचेतना अभियान प्रारम्भ

भैरहवा, १३ मङ्सिर । लैङ्गिक हिंसाविरुद्धको १६ दिने अभियानमा रुपन्देहीका स्थानीयस्तरसम्म पुगेर महिला तथा बालबालिका कार्यालयले सचेतना कार्यक्रमलाई निरन्तरता दिएको छ ।

मङ्सिर ९ गतेदेखि २४ गतेसम्म लैङ्गिक हिंसाविरुद्ध हुने कार्यक्रममा जिल्लाका २२ वटा सङ्घसंस्था परिचालन गरिएको महिला तथा बालबालिका कार्यालय रुपन्देहीले जनाएको छ ।

जिल्लामा क्रियाशील रहेका महिला सहकारी, किशोरी समूह, सामाजिक परिचालिका र विभिन्न सामाजिक सङ्घसंस्थाका कार्यकर्ताहरु गाउँगाउँमा पुगेर लैङ्गिक हिंसाविरुद्धको अभियानलाई निरन्तरता दिइरहेका छन् ।

महिला तथा बालबालिका कार्यालय रुपन्देहीको नेतृत्वमा विभिन्न सङ्घसंस्थाको सहकार्यमा जिल्लाका सबै क्षेत्रमा विभिन्न कार्यक्रम भइरहेको महिला अधिकारकर्मीहरुले बताएका छन् ।

अहिले यी सङ्घसंस्थाले मिलेर सेतो रिबन वितरण अभियान, पम्प्लेट वितरण, अन्तक्र्रिया, सडक नाटक, हिंसाविरुद्धको प्रशिक्षणजस्ता कार्यक्रमलाई प्रभावकारी बनाइएको छ ।

यस्ता कार्यक्रम नेपालका सबै जिल्लामा भइरहेको महिला बालबालिका तथा समाज कल्याण मन्त्रालयको सूचना शाखाले जनाएको छ ।

महिला बालबालिका तथा समाज कल्याण मन्त्रालयका सूचना अधिकारी उपसचिव रामप्रसाद भट्टराईले “राज्यले समतामूलक समाज निर्माणका लागि आफ्ना संयन्त्रमार्फत लैङ्गिक हिंसाविरुद्धको अभियानलाई तीव्रता दिएको जानकारी दिनुभयो ।” उहाँले राज्यले समाजमा हुने कुनै पनि लैङ्गिक हिंसाको अन्त्य होस् भन्ने उद्देश्यले विभिन्न क्रियाकलाप गरिरहेको जनाउँदै महिला हिंसालाई विशेष प्राथमिकतामा राखेर काम गरिरहेको जनाउनुभयो ।

महिला तथा बालबालिकाको कार्यालय रुपन्देहीकी प्रमुख उषा रावलले भन्नुभयो – “ सहरी क्षेत्रमा महिला सचेत रहे पनि ग्रामीण क्षेत्रमा हिंसा हुने क्रम नरोकिएको भन्दै यस्ता हिंसाविरुद्धमा विभिन्न निगरानी समूह बनाई परिचालन गरिएको छ ।”

रुपन्देहीमा अहिले लैङ्गिक हिंसाविरुद्धको अभियानलाई सबै क्षेत्रका महिला तथा सरोकारवालासमक्ष पु¥याउने कोसिस गरिएको छ ।

महिला अधिकारको आवाज बुलन्द गराउन निरन्तर लागिरहेको संस्था माइती नेपाल भैरहवा शाखाकी प्रमुख प्रभा खनालले “महिला तथा बालबालिका कार्यालयको सहकार्यमा लैङ्गिक हिंसाविरुद्ध सबै एकताबद्ध भएर अगाडि बढ्ने सहमति गरिएको बताउँदै माइती नेपालले सीमादेखि गाउँसम्म हिंसामा परेका महिलालाई सहायता दिइरहेको र यस्ता हिंसा अन्त्यका लागि लडिरहेको जनाउनुभयो ।

महिला अधिकारका विषयमा काम गरिरहेको गैरसरकारी संस्था नमुना एकीकृत विकास परिषद्की अध्यक्ष ज्ञानु पौडेलले महिला हिंसाविरुद्धको १६ दिने अभियानमा स्थानीयस्तरको सरकारी संयन्त्र महिला तथा बालबालिका कार्यालयको समन्वयमा विभिन्न कार्यक्रम अगाडि बढाइरहेको जनाउँदै महिला अधिकारको सञ्जाललाई स्थानीयस्तरका महिला पुरुषसमक्ष चेतना अभिवृद्धि, कानुनी सचेतना, हिंसापीडित महिलासँग अन्तक्र्रिया तथा घरेलु हिंसा विधेयकको कार्यान्यन पक्ष, बलात्कारजस्ता जघन्य अपराधको न्यूनीकरण र कानुनी प्रक्रियाका विषयमा लागिरहेको जनाउनुभयो ।

महिला हिंसाको विरुद्धमा हुने तुरुन्त सहजीकरण र कानुनी सहायताका विषयमा समेत १६ दिने लैङ्गिक अभियानमा महिलालाई जानकारी दिइएको छ । महिलाका लागि खडा गरिएको महिला प्रहरी सेल, प्रत्यक्ष हिंसापीडित महिलाका लागि स्थापना भएका सङ्घसंस्थाका विषयमा समेत स्थानीयस्तरमा गएर सचेतना गराइएको छ । महिलापीडित भएर होइन अधिकार लिएर बस्नसमेत यो अभियानले सिकाएको छ ।

पुरुषलाई समेत सेतो रिबन कार्यक्रमअन्तर्गत सेतो रिबन कार्यक्रम सुरु गरी म हिंसा गर्दिनँ, हिंसाको प्रतिकार गर्दछु र न्यूनीकरणमा सहयोग पु¥याउँछुजस्ता प्रतिबद्धता रुपन्देहीमा विभिन्न सङ्घसंस्थाले गराएका छन् ।

अहिले लैङ्गिक हिंसाविरुद्धमा गरिएको अभियानमा महिला मात्र सहभागिता गराउँदा पुरुष बेखबर हुने हुनाले यहाँको सङ्घसंस्थाले पुरुषलाई समेत सहभागिता गराएर कार्यक्रम गरिरहेको छ ।

राज्यले कानुनी प्रावधान गर्दासमेत विभिन्न सचेतनाको कमीले हिंसापीडित न्याय पाउने ढोकासम्म पुग्न निकै गाह्रो भएकाले यहाँका स्थानीय सङ्घसंस्थाले कानुनी बाटो देखाउँदै हिंसा गर्नेहरुलाई हुने कानुनी प्रक्रियालाई स्थानीयवासी महिला तथा पुरुषसम्म विभिन्न अन्तक्र्रियामार्फत पु¥याएका छन् । रासस

आठ महिना बितिसक्दा पनि विद्यार्थीको हातमा किताब पुगेन

जाजरकोट, १३ मङ्सिर । यहाँको साल्मा गाविसमा रहेको एक विद्यालयमा आठ महिनासम्म पनि पाठ्यपुस्तक नहुँदा विद्यार्थी मर्कामा परेका छन् । दुर्गम साल्मा गाविसको इन्द्रज्योति माध्यमिक विद्यालयमा आठ महिना बितिसक्दा पनि विद्यार्थीले पाठ्यपुस्तक पाएका छैनन् ।

उक्त विद्यालयमा कक्षा ८ मा अध्यनरत १५० र कक्षा १० मा १२० जना अध्ययनरत छात्रछात्राले पाठ्यपुस्तक नपाएको गुनासो गरेका हुन् । जिल्ला शिक्षा कार्यालयबाट पाठ्यपुस्तक खरिदका लागि जिम्मा लिएका पुस्तक विक्रेताको लापर्बाहीका कारण यस्तो समस्या आएको शिक्षकले बताएका छन् ।

अभिभावक मीना बुढाले पाठ्यपुस्तक पनि नभएको र पाठ्यपुस्तकको पैसा पनि हालसम्म विद्यालयले विद्यार्थीलाई नदिएको गुनासो गर्नुभयो । यता जिल्ला शिक्षा कार्यालयले पाठ्यपुस्तकको पूरै रकम विद्यालयको खातामा हालिसकेको बताएको छ ।

अर्का अभिभावक तुलसरी परियारले विद्यालयमा गएर बुझ्दा केही शिक्षकले किताब ल्याएका छाँै बीचबाटोमा छ ल्याएर वितरण गर्छौं भन्नुभएको थियो अहिलेसम्म दिनुभएको छैन किताब कहाँ छन् हामी सोझासिधालाई किन झुक्याइन्छ उहाँको भनाइ थियो ।

साल्माका इन्द्रज्योति माध्यमिक विद्यालयमा छात्रवृत्तिको दुई वर्षसम्मको पैसा नपाएको गुनासो अभिभावक विद्यार्थीले गर्ने गरेका छन् । रासस

दुर्घटनामा एकको मृत्यु

रत्ननगर (चितवन), १३ मङ्सिर । चितवनमा रहस्यमय दुर्घटनामा एक पुरुषको मृत्यु भएको छ ।

गएराति करिब ११ बजेको समयमा जिल्ला अदालत, चितवन अगाडि घाइते अवस्थामा फेला परेका स्थानीयवासी एक व्यक्तिको उपचारका क्रममा राति नै भरतपुर अस्पतालमा ज्यान गएको हो ।

चितवनका प्रहरी नायब उपरीक्षक राजन अधिकारीले सवारी साधनले ठक्कर दिएको जस्तो देखिने भरतपुर– ११ का ३८ वर्षीय एकप्रसाद दाहालको उपचारका क्रममा ज्यान गएको जानकारी दिनुभयो । सवारी साधनको खोजी भइरहेको र घटनाको अनुसन्धान भइरहेको अधिकारीले बताउनुभयो ।

भरतपुरको भित्री सडक चौबीसकोठीबाट मालपोत चोक जाने क्रममा सवारीले ठक्कर दिएको प्रहरीले अनुमान गरेको छ ।

उनको साथमा पासपोर्टसमेत फेला परेको र के कारणले राति त्यहाँ आएका थिए भनेर अनुसन्धान भइरहेको छ । रासस

उत्कृष्ट चार किसानलाई मेसिन अनुदान

परासी, १३ मङ्सिर । नवलपरासीका उत्कृष्ट चारजना दुग्धको कारोबार गर्ने किसानलाई दूध दुहुन प्रयोग हुने मेसिन प्रदान गरिएको छ ।

पशुसेवा विभागबाट प्राप्त भएका चारवटा दूध दुहुन प्रयोग हुने मेसिन किसानलाई वितरण गरिएको पशुसेवा कार्यालयका प्रमुख डा शङ्कर शाहले बताउनुभयो ।

सो मेसिन प्राप्त गर्ने किसानहरुमा गोपाल श्रेष्ठ, दधीराम सुवेदी, पदम ढकाल, होमनाथ कँडेल रहेका छन् ।

विशेष गरी नवलपरासीको मुकुन्दपुर क्षेत्र दुग्ध उत्पादनका लागि नेपालमै नमुना मानिन्छ ।

जिल्लामा दूधको सङ्कलन र बिक्री गर्ने कारोबार गर्ने ७२ वटा ठूला संस्था रहेका छन् । नवलपरासीमा वार्षिक ६३ हजार मेट्रिक टन दूध उत्पादन हुँदै आएको छन् । रासस

यातायात व्यवसायी मारमा : अध्यक्ष भण्डारी

भीमदत्तनगर, १३ मङ्सिर । नेपाल यातायात व्यवसायी राष्ट्रिय महासङ्घका अध्यक्ष दिनेश भण्डारीले नाकाबन्दीका कारण यातायात व्यवसायी मारमा परेको बताउनुभएको छ ।

उहाँले इन्धनको अभाव रहेको भए पनि व्यवयासीहरु राष्ट्रियता र स्वाभिमानका लागि जेनतेन यातायात सञ्चालन गरिरहेको धारणा राख्नुभयो ।

शनिबार कञ्चनपुरको भीमदत्तनगरस्थित पवनदूत यातायात समितिको १२औँ अधिवेशनको उद्घाटनमा बोल्दै अध्यक्ष भण्डारीले व्यवसायीले एकताबद्ध भएर हालको परिस्थितिलाई सहज बनाउन दबाब दिनुपर्नेमा जोड दिनुभयो ।

“राष्ट्रलाई सङ्कट परेका बेला व्यवसायीहरु एकढिक्का भएर अघि बढ्नुपर्छ ।” अध्यक्ष भण्डारीले भन्नुभयो – “भारतीय पक्षबाट नेपालमा मानवीय सङ्कट निम्त्याउन खोजेको जस्तो देखिन्छ ।”

कार्यक्रममा यातायात व्यवसायीले इन्धनमा कालोबजारी भइरहँदा सरकार तथा स्थानीय प्रशासन मौन बसेकोप्रति गुनासो व्यक्त गरेको पवनदूत यातायात समितिका महासचिव कर्मबहादुर सिंहले जानकारी दिनुभयो । रासस

मुस्ताङ बन्यो १२औँ पूर्ण खोपयुक्त जिल्ला

मुस्ताङ, १३ मङ्सिर । हिमालपारिको जिल्ला मुस्ताङलाई नेपालकै १२औँ पूर्ण खोपयुक्त जिल्ला घोषणा गरिएको छ ।

शनिबार सदरमुकाम जोमसोममा एक समारोहका बीच व्यवस्थापिका–संसद्का सांसद श्रीमायाँ थकालीले जिल्लामा अब जन्मने बालबालिकालाई समेत खोपको पहुँच पु¥याउने प्रतिबद्धतासहित पूर्ण खोपयुक्त जिल्ला घोषणा गर्नुभएको हो ।

एक वर्षअघि कुञ्जो गाविसबाट सुरु गरिएको पूर्ण खोपयुक्त अभियानका क्रममा जिल्लाभरका एक वर्षभित्रका १९१ बालबालिका र एक वर्षदेखि २३ महिनाभित्रका १९६ बालबालिकामा खोप पहुँच पुगेपछि जिल्लालाई पूर्ण खोपयुक्त क्षेत्र घोषणाका लागि बाटो खुलेको खोप सुपरभाइजर बद्री आचार्यले जानकारी दिनुभयो ।

घोषणासभामा बोल्दै, सांसद थकालीले दुर्गम जिल्लाका बालबालिका खोपको पहुँचमा आउनु सराहनीय कार्य भएको भन्दै यसलाई निरन्तरता दिनका लागि सबै एकजुट हुनुपर्ने बताउनुभयो ।
जन्मेदेखि २३ महिनाभित्र बालिबालिकालाई बिसिजी, डिपिटी, पोलियो, दादुरा–रुबेलालगायत १० प्रकारका रोगविरुद्ध विभिन्न चरणमा खोपको मात्रा पूरा गरेपछि पूर्णखोप क्षेत्र घोषणा गर्न सकिने कानुनी प्रावधान छ । १६ वटा गाविस रहेको जिल्लामा असोज २८ गते लेते गाविसलाई अन्तिम गाविसको रुपमा पूर्ण खोपयुक्त क्षेत्र घोषणा गरिएको थियो । रासस

संरक्षण हुन सकेन ऐतिहासिक सूर्यकुण्ड

रामपुर (पाल्पा), १३ मङ्सिर । श्रीस्वस्थानी व्रतकथासँग धार्मिक महत्व जोडिएको ऐतिहासिक सूर्यकुण्डको अझै पनि संरक्षण हुन सकेको छैन ।

अतिक्रमणको चपेटामा रहेको तानसेन नगरपालिका– ११ प्रभाषमा अवस्थित सूर्यकुण्ड वरिपरि निजी क्षेत्रका भवन निर्माण हुँदा यसको क्षेत्रफल साँघुरिदै गई धार्मिक महत्व अस्ताउँदै गएको छ ।

कमलपोखरीको आडमा रहेको सूर्यकुण्ड २४ रोपनी क्षेत्रफलमा फैलिएको छ । हिन्दू धर्मग्रन्थअनुसार श्रीस्वस्थानीको मुख्य पात्र सतीदेवीको एक अङ्ग पतन भएको प्रभाषमा त्यस स्थानमा वंश गोपालको नामबाट महादेव उत्पत्ति भएको र त्यसै समयमा कुण्ड पनि उत्पत्ति रहेको धार्मिक जनविश्वास रहिआएको छ ।

यस कुण्डमा हरेक वर्ष साउन महिनाको सोमबार स्नान गरी वंशगोपाल मन्दिरमा जल चढाउनेको भीड लाग्ने गर्छ । सूर्यकुण्ड क्षेत्र वरपर निजी क्षेत्रका भवन निर्माण हुँदा कुण्डको धार्मिक महत्व हराउँदै जान थाले पनि यस विषयमा सरोकारवाला निकाय मौन बनेको छ ।

विसं ०६३÷६४ देखि अतिक्रमण गर्ने क्रम बढेको स्थानीय बासिन्दा बताउँछन् । कुण्डको आसपासमा लुम्बिनी मेडिकल कलेज सञ्चालक समितिका जिम्मेवार व्यक्तिले व्यक्तिगत प्रयोजनका लागि भवन निर्माण गरेका कारण यसको क्षेत्रफल साँघुरिदै गएको छ ।

यस विषयमा बेलाबेलामा स्थानीयवासीदेखि राष्ट्रिय सञ्चार माध्यममा आवाज उठे पनि जिविस, नगरपालिका, स्थानीय बासिन्दाको बेवास्ताका कारण कुण्डको क्षेत्रफल दिनप्रतिदिन साँघुरिदै गएको छ ।

जिविसका पूर्व सभापति प्रेमनाथ बस्याल भन्नुहुन्छ – “सरोकारवाला निकायको ध्यान जान नसक्दा ऐतिहासिक धार्मिक महत्व बोकेको सूर्यकुण्ड अतिक्रमणमा परेको छ, यसको संरक्षणमा स्थानीय निकाय नै तात्नुपर्ने हुन्छ ।” परापूर्वकालदेखि नै धार्मिक महत्व बोकेको सूर्यकुण्ड क्षेत्र अतिक्रमणमा परी संरक्षणमा कसैको ध्यान जान नसक्दा यसको अस्तित्व नै गुम्दै गएको छ ।

पछिल्लो समय बाक्लो बस्ती बढ्दै गएका बखत जथाभावी रुपमा नियम विपरीत भवन निर्माण कार्य गर्दा ऐतिहासिक र धार्मिक महत्व बोकेका क्षेत्रहरु खुम्चिन पुगेका छन् । जसले गर्दा तिनको अस्तित्व नै गुम्ने अवस्थामा सूर्यकुण्डजस्ता थुप्रै धार्मिक तथा ऐतिहासिक सम्पदा छन् । यिनीहरुको संरक्षणमा सम्बन्धित निकायले बेलैमा चासो नदिने हो भने इतिहासका पानामा मात्र नाम सीमित रहन पुग्छ । रासस

अध्यक्ष दाहालद्वारा प्रम ओली र सभापति कोइरालासँग भेट

काठमाडौँ, १२ मङ्सिर । एकीकृत नेकपा (माओवादी)का अध्यक्ष पुष्पकमल दाहालले प्रधानमन्त्री केपी शर्मा ओली र नेपाली काँग्रेसका सभापति सुशील कोइरालालाई आज छुट्टाछुट्टै भेटी भारतद्वारा गरिएको नाकाबन्दी र मधेस आन्दोलन समाधानका विषयमा छलफल गर्नुभएको छ ।

दुवै भेटमा अध्यक्ष दाहालले आगामी मङ्सिर १५ गते डाकिएको संसद्को बैठकअघि नै मधेसको समस्या समाधान गर्न आवश्यक कदम चाल्ने र नाकाबन्दीका बारेमा प्रमुख दलहरुबीच समान धारणा बनाउनेबारे छलफल गर्नुभएको दाहालका सहयोगी एमाओवादीका केन्द्रीय सदस्य चुडामणि खड्काले जानकारी दिनुभयो ।

प्रधानमन्त्री निवास बालुवाटारमा प्रधानमन्त्रीसँग आज साँझ भएको भेटमा अध्यक्ष दाहालले सत्तारुढ दल, प्रमुख प्रतिपक्षी दल नेपाली काँग्रेस र आन्दोलनरत मधेसवादी दल सम्मिलित त्रिपक्षीय बैठक तुरुन्त बोलाउन आग्रह गर्नुभएको उहाँले जानकारी दिनुभयो ।

अध्यक्ष दाहालले राष्ट्रिय हितलाई केन्द्रबिन्दुमा राखेर सहमति खोज्न अब ढिलो गर्न नहुने भनाइ प्रधानमन्त्रीसँग राख्नुभएको बताइएको छ ।

भेटमा प्रधानमन्त्रीले त्रिपक्षीय बैठक तुरुन्त राख्ने जानकारी अध्यक्ष दाहाललाई दिँदै आफू समस्या समाधानका लागि प्रयासरत रहेको जानकारी दिनुभएको थियो ।

त्यसअघि, आजै साँझ अध्यक्ष दाहालले काँग्रेस सभापति सुशील कोइरालाको महाराजगन्जस्थित निवासमा पुगी छलफल गर्नुभएको थियो ।

भेटमा अध्यक्ष दाहालले प्रमुख तीन दल मिलेर नै संविधान जारी भएको बताउँदै अब संविधानको कार्यान्वयनमा पनि तीन दल मिलेर जानुको विकल्प नरहेकोमा जोड दिनुभएको एमाओवादी केन्द्रीय सदस्य खड्काले जानकारी दिनुभयो ।

मधेस आन्दोलनका माग समग्र प्याकेजमा खोज्नुपर्नेमा दुवै नेताहरुबीच सहमति भएको छ ।

भेटमा सभापति कोइरालाले आफ्नो नेतृत्वको सरकारले संसद्मा प्रस्तुत गरेको समावेशी, समानुपातिक प्रणालीसम्बन्धी प्रस्ताव पारित गरे मधेसको धेरै मागको सम्बोधन हुने भन्दै त्यो पारित गर्न सहयोगका लागि अध्यक्ष दाहाललाई आग्रह गर्नुभएको थियो ।

यसअघि, हिजो सभापति कोइरालाले तमलोपाका अध्यक्ष महन्थ ठाकुरसंग मधेश आन्दोलनको समाधानका विषयमा छलफल गर्नु भएको थियो । रासस

मधेस केन्द्रित दलले काँग्रेसको झन्डा जलाए

पर्सा, १२ मङ्सिर । मधेस आन्दोलनको विषयलाई लिएर नेपाली काँग्रेस नगर कार्यसमिति वीरगन्जले आज यहाँ निकालेको जुलुसमा सङ्घीय समावेशी गठबन्धनका कार्यकर्ताले हस्तक्षेप गरी काँग्रेस पार्टीको झन्डा जलाएका छन् ।

वीरगन्जको माइस्थान चोकबाट नगर कार्यसमितिले निकालेको जुलुस नगर परिक्रमा गरी माइस्थान पुग्दा गठबन्धनका नेता कार्यकर्ताले काँग्रेसका कार्यकर्ताको हातबाट झन्डा र ब्यानर खोसी आगो लगाएका हुन् ।

नेपाल सद्भावना पार्टीका केन्द्रीय सदस्य शिवप्रसाद पटेलले जारी मधेस आन्दोलनमा कुनै पनि पार्टीको झन्डा प्रयोगमा रोक लगाइएकाले काँग्रेसको झन्डामा आगो लगाइएको बताउनुभयो ।

यता काँग्रेसका नगर सभापति महम्मद सहाबुदिनले लामो समयदेखि चल्दै आएको मधेसको मागलाई सम्बोधन गर्न सरकारमाथि दबाब दिने उद्देश्यका साथ निकालिएको जुलुसमा मधेस केन्द्रित दलका नेता कार्यकर्ताले हस्तक्षेप गरी पार्टीको झन्डा जलाएर निन्दनीय कार्य गरेको बताउनुभयो । रासस

‘पाँचौँ अन्तर्राष्ट्रिय लोक फिल्म महोत्सव’ सम्पन्न

काठमाडौँ, १२ मङ्सिर । अमूल्य अमूर्त अनुसन्धान लोकगीत, लोक सङ्गीत, लोकबाजा लोकनाच, लोक संस्कृति, लोकपरम्परा र लोकजीवनका विविध पक्षको अध्ययन अनुसन्धान र प्रचारप्रसार गर्ने उद्देश्यले आयोजना गरिएको ‘पाँचौँ अन्तर्राष्ट्रिय लोक फिल्म महोत्सव’ आज सम्पन्न भएको छ ।

‘जीवनका लागि सङ्गीत र बाँच्नका लागि सङ्गीत’ भन्ने मूल नारासहित सुरू भएको महोत्सव नेपाली लोकबाजा सङ्ग्रहालयको आयोजना तथा सांस्कृतिक संस्थानको सहआयोजनामा यही मङ्सिर १० गतेबाट सुरू भएको थियो ।

महोत्सवमा विश्वका विभिन्न राष्ट्रका मौलिक लोक संस्कृतिको अनुसन्धान र संरक्षणको लागि भइरहेको कार्यका बारेमा अनुभव आदानप्रदानसमेत गरियो । महोत्सवमा नेपालसहित विभिन्न देशका विज्ञले लोक सङ्गीतसम्बन्धी कार्यपत्रसमेत प्रस्तुत गर्नुभयो । महोत्सवमा नेपालसहित विभिन्न देशका विज्ञले लोक सङ्गीतसम्बन्धी चारवटा कार्यपत्र प्रस्तुत गनुभयो ।

महोत्सवमा विभिन्न देशका लोक सङ्गीत संस्कृति, जीवनशैलीसम्बन्धी १३५ वटा वृत्तचित्रले भाग लिएकामा आमन्त्रित, अप्रतियोगी र प्रतियोगी गरी १८ वटा देशका छनोटमा परेका ३५ वृत्तचित्रको प्रदर्शन गरिएको थियो ।

विभिन्न देशबाट भाग लिएका लामो समयका फिल्ममध्ये ‘आई उइल सिङ फर यू’, र ‘नो ल्यान्ड सङ’ उत्कृट भएका छन् । त्यसैगरी छोटो समयका फिल्ममध्ये ‘वोय वोय’ (दयथ दयथ), नामक फिल्म उत्कृट भएको छ । ‘द फरगटन थारू स्टुमेन्ट’ नामक फिल्मलाई उत्कृष्ट विद्यार्थी फिल्म अवार्ड प्रदान गरिएको छ ।

समापन कार्यक्रममा विगत आठ दशकदेखि अविच्छिन्न रूपमा स्थानीय नेवारी लोक सङ्गीत संस्कृतिको सम्वद्र्धन र प्रवद्र्धनमा लागिरहनुभएका ८८ वर्षका भीमबहादुर नकर्मीलाई लाइफ लाइम एचिभमेन्ट अवार्ड प्रदान गरिएको नेपाली लोकबाजा सङ्ग्रहालयका अध्यक्ष रामप्रसाद कँडेलले जानकारी दिनुभयो । रासस

चितवनमा नाकाबन्दीविरुद्ध प्रदर्शन छातीमा लेखे–भारतीय हस्तक्षेप बन्द गर

रत्ननगर (चितवन), १२ मङ्सिर । चितवनमा आज भारतीय नाकाबन्दीविरुद्ध र सद्भावका लागि भन्दै छुट्टाछुट्टै रुपमा विभिन्न सङ्घसङ्गठनले प्रदर्शन गरेका छन् ।

चितवनमा नेकपा माओवादीले भारतीय हस्तक्षपको विरोध ¥यालीसहित आज प्रदर्शन गरेको छ ।

चितवनको चौविसकोठीबाट नारायणगढसम्म उनीहरुले प्रदर्शन गर्दै हस्तक्षेप र नाकाबन्दी बन्द गर्न माग गरेका थिए । सो पार्टीका जिल्ला नेता किरण पोखरेलले नाकाबन्दी नरोके कडा आन्दोलन गर्ने चेतावनीसमेत दिनुभयो ।

सो विरोध ¥यालीमा १२ जना युवाले आफ्नो छातीमा अक्षर कोरेर ‘भारतीय हस्तक्षेप बन्द गर’ लेखेर प्रदर्शन गरेका थिए ।

उनीहरुको ¥याली भरतपुरको चौबिसकोठीबाट सुरु भएको थियो । नारायणगढको पुल्चोकमा पुगेर कोणसभा गरेको विप्लव माओवादीले भारतीय गाडी चल्न नदिने र भारतीय च्यानलसमेत बन्द गर्ने घोषणा गरेको छ ।

यस्तै आजै भरतपुरमा चिकित्सक तथा स्वास्थ्यकर्मीले पनि प्रदर्शन गरेका छन् । उनीहरुले नेपाल सरकार र आन्दोलनरत दललाई समस्या समाधान गर्ने आग्रह गर्दै दबाब ¥याली निकालेका हुन् ।

नागरिक समूहको समेत सहभागिता रहेको उक्त ¥यालीमा सद्भाव बढाउने खालका वाक्य लेखिएका प्लेकार्डसमेत प्रदर्शन गरिएको थियो । रासस

सार्क राष्ट्रका न्यायाधीशहरुको चौथो सम्मेलन सुरु

काठमाडौँ, १२ मङ्सिर । समग्र वातावरण र आर्थिक विकासको अन्तरसम्बन्धलाई दिगो बनाई वातावरणमैत्री दक्षिण एसियाको विकास गर्न टेवा पु¥याउने उद्देश्यले आयोजित सार्क राष्ट्रका प्रधान न्यायाधीश तथा न्यायाधीशहरुको चौथौ दक्षिण एसियाली सम्मेलन आजदेखि काठमाडौँमा सुरु भएको छ ।

सर्वोच्च अदालत नेपाल र एसियाली विकास बैंकको संयुक्त आयोजनामा आज दक्षिण एसियाली क्षेत्रीय सङ्गठन सार्कका सदस्य राष्ट्रका प्रधान न्यायाधीश तथा न्यायाधीशहरुको ‘वातावरणीय न्याय’ विषयक सम्मेलनको प्रधान न्यायाधीश कल्याण श्रेष्ठले उद्घाटन गर्नुभयो ।

उद्घाटन समारोहमा प्रधान न्यायाधीश श्रेष्ठले नेपालको संविधानले स्वच्छ तथा स्वस्थ वातावरणको अधिकारलाई मौलिक अधिकारका रुपमा राखेको बताउनुभयो । उहाँले सो अधिकारको उल्लङ्घन भएको अवस्थामा पीडितले कानुनमा व्यवस्था भएबमोजिम क्षतिपूर्ति पाउने व्यवस्था भएकाले विकासका गतिविधि सञ्चालन गर्दा वातावरणीय सन्तुलन कायम गर्नुपर्ने कुरामा जोड दिनुभयो ।

प्रधान न्यायाधीश श्रेष्ठले प्राकृतिक विपत्तिलाई नियन्त्रण गर्न नसकिने भए तापनि वातावरणीय सुशासन कायम गर्न सकेमा यसबाट पुग्ने क्षतिलाई न्यूनीकरण गर्न सकिने कुरा बताउनुभयो ।

भुटानका प्रधान न्यायाधीश ल्योन्पो छिरिङ वाङ्चुकले भुटानको संविधानमा देशको कुल क्षेत्रफलको ६० प्रतिशत भू–भाग प्राकृतिक तथा वृक्षारोपण गरिएको वनक्षेत्रले ढाक्नुपर्ने अनिवार्य व्यवस्था गरेको जानकारी गराउनुभयो । उहाँले वातावरण र विकासका बीचको सन्तुलन कायम गर्न न्यायपालिकाले भूमिका खेल्नुपर्ने कुरामा जोड दिनुभयो ।

दुई दिनसम्म चल्ने सम्मेलनमा बङ्गलादेश, पाकिस्तान, अफगानिस्तान, श्रीलङ्का, भुटानको सहभागिता रहेको छ । भुटानको सर्वोच्च अदालतका प्रधान न्यायाधीश ल्योन्पो छिरिङ वाङ्चुक तथा न्यायाधीश छिरिङ नामगेलले सम्मेलनमा भाग लिनुभएको छ ।

त्यसैगरी, अफगानिस्तानको सर्वोच्च अदालतका न्यायाधीश बहाउद्दिन बहा, बङ्गलादेशको सर्वोच्च अदालतका न्यायाधीश सइद रेफात अहमद, पाकिस्तानको सर्वोच्च अदालतका न्यायाधीशहरु दोस्त मोहम्मद खान र काजी फाइज इसा, श्रीलङ्काको सर्वोच्च अदालतका न्यायाधीशहरु डब्ल्यु पिसी देप र एसई वानासुन्दराले भाग लिनुभएको छ ।

साथै, भारतको ग्रीन ट्राइबुनलका अध्यक्ष स्वतन्त्र कुमार, पाकिस्तानको लाहोर उच्च अदालतका न्यायाधीश मन्सुर अलि साह, बेलायतको सर्वोच्च अदालतका न्यायाधीश लर्ड रबर्ट कानवार्थ पनि सम्मेलनमा सहभागी हुनुहुन्छ ।

यस सम्मेलनमा दक्षिण एसियाका न्यायपालिकाको साथै बेलायत अमेरिकालगायतका अन्य राष्ट्रबाट विशेषज्ञका रुपमा सहभागी भई वातावरणीय न्यायका विविध विषयमा कार्यपत्रहरु प्रस्तुत गर्ने कार्यक्रम रहेको छ । यस सम्मेलनमा सहभागी र विशेषज्ञहरु गरी विदेशबाट ३० जनाले सम्मेलनमा सहभागिता जनाउनुभएको छ ।

नेपालका तर्फबाट प्रधान न्यायाधीश, सर्वोच्च अदालतका सम्पूर्ण न्यायाधीशहरु, पुनरावेदन अदालतका सम्पूर्ण मुख्य न्यायाधीशहरु र न्यायाधीशहरु, जिल्ला न्यायाधीशहरु, नेपाल सरकार मन्त्रिपरिषद्को कार्यालय, कानुन तथा न्याय मन्त्रालय, विज्ञान तथा प्रविधि मन्त्रालय, वन तथा भूसंरक्षण मन्त्रालय, उद्योग मन्त्रालय, महान्यायाधिवक्ताको कार्यालयका प्रतिनिधि तथा वातावरणको क्षेत्रमा काम गर्ने विभिन्न व्यक्तित्वको सहभागिता रहेको छ ।

सम्मेलनमा एसियाली विकास बैंकको आर्थिक सहयोग रहेको छ भने सम्पूर्ण व्यवस्थापकीय कार्य सर्वोच्च अदालतले गरेको छ । सम्मेलनको विषयवस्तुलाई समेट्दै विश्व वन्यजन्तु कोष नेपालले सम्मेलनको आधारपत्र तयार गरेको छ ।

विषयगत रुपमा १२ वटा कार्यपत्र आज प्रस्तुत भएका छन् भने आइतबार तीनवटा सत्रहरु सञ्चालन भई १२ वटा प्रस्तुतिकरण हुनेछन् । विगतका सम्मेलनहरुबाट पारित घोषणापत्र र कार्ययोजनाहरुको सारसङ्क्षेप प्रस्तुति गरी काठमाडौँ घोषणापत्र जारी गरी सम्मेलनको समापन हुनेछ ।

सम्मेलनबाट दक्षिण एसियाली राष्ट्रका न्यायपालिकाहरुका बीच वातावरणसँग सम्बन्धित विवादको समाधानका लागि न्यायिक जनशक्तिको क्षमता विकास गर्न आवश्यक हुने विभिन्न क्रियाकलाप र अनुभवहरुको आदानप्रदान गर्ने अवसर मिल्ने विश्वास गरिएको छ । रासस